Waxaa ka mid ah Bidcada Jimcada:
Bidcada salaadda Sunnada hore ee Jimcada
Al-Callaama Sheekh Maxamed Naasirud-Diin al-Albaani -Eebbe ha u naxariistee- wuxuu ku yiri ”Silsila al-Hudaa wa Nuur (003/03) markii la weyddiiyey salaadda Jimcada ma leedahay Sunno horteed la tukado?
Sheekh Albaani wuxuu ku jawaabay ma jirto salaadda Jimcada Sunno ay leedahay oo horteed la tukado. Sunnadan Jimcada ee ay yaqaanaan maanta dadka badankiisa asal kuma laha Sunnada. Maxaa yeelay Xaddiiska ku soo arooray Saxiixul Bukhaariga oo ah Kitaabka ugu saxsan marka laga yimaado Kitaabka Eebbe ee tebintiisu ay ka sugan tahay as-Saa’ib Ibnu Yaziid wuxuu yiri:
Wuxuu ahaa Aadaanku waqtigii Nebiga amaanta Eebbe iyo nabadgelyadiisa korkiisa ha ahaatee ”Aadaanka koowaad oo keliya” markuu koro Rasuulku a.n.k. Minbarka waxaa addimi jirey Mu’addinka, markuu dhammeeyo Mu’addinka aadaanka, wuu istaagi jirey Rasuulka a.n.k. si uu u khudbeeyo. Mana jirto goor la tukado Sunno Jimce oo horteed la tukado.
Sunnada maalinta Jimce waxay tahay inuu qofka Muslimka ahi markuu yimaado Masjidka hadday ahaato waqti hore iyo waqti dambeba inuu tukado wixii uu jeclaysto oo uu ka gaaro hadday ahaan lahayd laba rakcadood, afar rakcadood, lix rakcadood, siddeed rakcadood iyo wixii ka badanba. Maxaa yeelay salaadahani waa Sunno, ma aha Sunno uu xaddiday Rasuulka amaanta Eebbe iyo nabadgelyadiisa korkiisa ha ahaatee. Hase ahaatee Sunnadan ay tukanayaan dadka ”labada Aadaan dhexdooda” ee salaadda Jimcada iyagoo u haystaan inay tahay salaad Sunno oo la tukado Salaadda Jimcada horteed ma aha wax uu yaqaanay Nebiga amaanta Eebbe iyo nabadgelyadiisa korkiisa ha ahaatee.
Diyaariye CabdiRisaaq Maxamed Cilmi ”ina Warfaa” ina_warfaa@hotmail.com http://www.freewebs.com/ina-warfaa