Mogadishu 14, May.07 ( Sh.M.Network) Rag labisan dareeska ciidamada dowladda kMG ah ee Somalia ayaa dhac iyo boob ka geeystay qeybo ka mid ah suuqa Bakaaraha ee magaalada Muqdisho, xilli shalay ciidamo boolis ah la keenay isgoysyo ku dhow suuqaasi.
Falkaan oo ka dhacay qeybta dawada ee suuqa Bakaaraha ayaa waxaa geeystay 3 nin oo labisan dhar tuuto ah, kuwaasi oo ganacsatada ku amray in ay baaritaano ku sameeyaan goobahooda, iyagoo sheegaya in ay yihiin ciidamada dowladda KMG ah ee Somalia ee hubka dhigista ka wada caasimadda.
Raggaan ayaa waxa ay boobka ugu xoogan ka geysteen bakhaar weyn oo dawada lagu iibiyo, iyagoo soo galay bakhaarkaasi deetada ku amray milkilaha bakhaarka in uu furo qasnadda, iyagoo markaasi ka dibna ka qaatay lacag wali aan sheegin cadadkeeda sida ay sheegeen qaar ka mid ah ganacsatada oo codsaday in aan la shaacin magacooda sababo xagga amaanka ah.
Ganacsatadii kale ee goobahaasi ka agdhowaa ayaa markii ay ka war heleen falkaan boobka ah waxa ay albaabada isugu dhufteen goobahooda ganacsiga, taasi oo keentay in suuqa uu noqdo meel cidlo ah, iyadoo aan la gaarin waqtiga ay rawixi jireen ganacsatada galinkii dambe ee shalay.
Arintaan ayaa cabsi iyo walwal ku beertay ganacsatada gobolka Banadir oo ku cabanaya in hubkii ay isaga dhici lahaayeen kooxaha wax booba ay ku wareejiyeen dowladda KMG ah ee Somalia, isla markaana haatan lagu dhacayo dareeskii dowladda KMg ah.
Lama oga hadii raggaasi ay ka tirsanaayeen ciidamada dowladda KMG ah iy haddii ay ahaayeen rag isku soo ekeeysiyay, waxaana ay ku soo beegmeysaa, xilli shalay ciidamo boolis ah la dhigay qaar ka mid ah wadooyinka soo gala suuqa Bakaaraha oo horey ay u joogeen ciidamo Militari ah oo halkaasi laga qaaday.
Waxaana ciidamadan booliska ah ee la wareegay isgoysyada Aadan Cadde iyo H/wadaag ay ka dambeysay baaq ka soo baxay ganacsatada suuqa Bakaaraha sida Gudoomiyaha ganacsatada suuqa Bakaaraha Cali Dheere oo codsaday in ciidamo boolis ah la keeno wadooyinka soo gala suuqa oo falal dhac iyo baarasho ah ay ka wadeen kooxo aan la garaneyn.