Qaar ka mid ah mas’uuliyiinta iyo saraakiisha beesha Sadde ee ku sugan Kismaayo oo ka jawaabay hadalkii ka soo yeeray madaxweyne Yuusuf ee ahaa..
Mas’uuliyiinta iyo saraakiisha ka soo jeeda beesha Sadde ee ku sugan magaalada Kismaayo ee gobolka J/hoose ayaa ka jawaabay hadalkii shalay ka soo yeeray madaxweynaha dowladda federaalka Soomaaliya C/llaahi Yuusuf Axmed ee ahaa in magaaladaasi ay gacanta ku hayaan kooxo diidan dowladda Soomaaliya, iyagoo ku tilmaamay in hadalkaasi uu yahay mid laga xumaado oo xaqiiqada ka fog, waxayna xuseen in magaalada Kismaayo iyo maamulka gacanta ku hayaba ay horey u sheegeen, mar kalena ku celinayaan iney taageersan yihiin dowladda federaalka Soomaaliya.
Axmed Cabdi Cumar (Sandheere) oo ahaa guddoomiye ku-xigeenka gobolka J/hoose oo ka mid ahaa mas’uuliyintii ka hadashay arintan ayaa sheegay in hadalada madaxweynaha ay yihiin kuwo nasiib daro ah oo aan dhexdhexaad aheyn, wuxuuna tilmaamay in Magaaladaasi ay si caadi ah uga howlgalaan guud ahaan hey’adaha kala duwan ee dowladda federaalka “Madaxweynaha hadaladiisa waxaa ka muuqatay inuusan la socon xaqiiqada Kismaayo taala, waxaana loo sheegay waxyaabo aan jirin oo la been abuuray, ma jiro qabiil ka taliya magaalada Kismaayo dowladda ayaana si buuxda uga talisa” ayuu yiri Sandheere oo sheegay in ay iyagu ay ogol yihiin dhexdhexaadin laga galo waxyaabihii ka dhacay Kismaayo oo laakiin ay ka socon weysay dhinaca kale ee dibeda jooga.
Sidoo kale, C/risaaq Cali Faarax (Taano) oo ka mid ah mas’uuliyiinta beesha Sadde ee gacanta ku heysa magaalada Kismaayo ee gobolka J/hoose ayaa sheegay ineysan jirin beel gacanta ku heysa magaalada Kismaayo oo ka soo horjeeda dowladda federaalka Soomaaliya, wuxuuna xusay in dagaalkii ka dhacay magaalada ay sababteeda lahaayeen saraakiisha ciidamada ee ay soo magacowday dowladda Soomaaliya haatana dibeda ka jooga magaaladaasi, kuwaasoo uu sheegay in waxa dhacay uu ku yimid khaladaad ay sameeyeen saraakiishaasi, balse uusan aheyn mid ku saleysan diidmo la diidan yahay maamulkii ay dowladdu soo magacowday oo uu xusay in haatanba ay ka taliyaan magaalada Kismaayo, wuxuuna wax laga xumaado ku tilmaamay in dad dowladda taageersan lagu tilmaamo iney yihiin kuwo dawlad diid ah.
Xafiiska wararka ee Muqdisho, Somalia
dayniilecom@hotmail.com
