Maxamed Xasan Xaad oo ah guddoomiyaha gole sheegta inuu matalo Beesha Hawiye ayaa daboolka ka qaaday markii ugu horreysay in golihiisa uu ku biiray mucaaradka hubeysan ee dagaallada kala horjeeda DF iyo ciidamada shisheeye ee ku sugan Somalia.
Xaad oo la hadlayay saxaafadda Muqdisho ayaa sheegay inay u dulqaadan waayeen joogitaanka ciidamada Itoobiya, ayna diyaar u yihiin wixii hadda ka dambeeya inay dagaal hubeysan kala hortagaan ciidamada Itoobiya iyo Ciidamada DF oo uu ku tilmaamay inay yihiin kuwo gacan ku siinaya Itoobiya inay dalka sii joogto.
"Adeer, C/llaahi Yusuf wuxuu doonayaa inuu ku shaqeyo si aan Madaxweynenimo ahayn, taasoo nagu kalliftay inaan caddeyno inaan qaadacno Madaxweynenimadiisa iyo joogitaanka ciidamada Itoobiya ee dalka ku sugan" ayuu yiri Maxamed Xaad oo ku dhaartay inay dagaal kala hortagayaan ciidamada Itoobiya, wixii hadda ka dambeeya.
Wuxuu sheegay in dadaallada nabaded ee uu wado Ra'iisul Wasaraha Somalia Nuur Cadde uu jabiyay Madaxweyne Yuusuf, isagoo carrabka ku ballaariyay inaysan aqbalayn dadaallada nabadeed ee uu wado Nuur Cadde, ayna tahay in lala dagaalamo xukuumadda Somalia iyo ciidamada Itoobiya, isagoo aan soo hadal qaadin ciidamada AMISOM ee ku sugan Muqdisho.
"Magaalada Muqdisho waxaa la keenay ciidamo fara badan oo Itoobiyaan ah, waxaana la doonayaa in lagu dhibaateeyo dadka ku dhaqan Muqdisho oo keliya, maxaa loo geyn waayay Boosaaso iyo Kismaayo? taasi waxay tusaale u tahay in dadka ku nool Muqdisho la rabo in lagu qabsado xoogga Itoobiya" ayuu yiri Maxamed Xasan Xaad oo hadalladiisa ay muqdeen caro aad u xoogan.
Xaad ayaan sheegein halka ay u jogaan ciidamada uu kala hortagayo dowlada iyada oo loo qaadan karo in dagaal galinayo dhalinyarada ururka uu sheegto in uu madaxda ka yahay.
Dhawaan ayuu Ra'iisul Wasaaraha Somalia Nuur Cadde; wuxuu oodda ka rogay xubno ka tirsan Golaha Xaad oo uu ka mid ahaa Axmed Diiriye Cali, wuxuuna Ra'iisul wasaaruhu sheegay inay taasi qayb ka tahay dadaallada nabadeed ee uu wado, iyadoo Madaxweyne Yuusufna uu soo dhaweeyay talaabada lagu sii daayay xubnahaas.
Waa markii ugu horreysay oo uu ku dhawaaqo Maxamed Xasan Xaad inay ku biireen xoogagga hubeysan ee mucaaradka DF, waxaana Duqa Muqdisho Maxamed Dheere uu horay u sheegay in Maxamed Xasan Xaad iyo Axmed Diiriye ay yihiin adeegayaasha kooxda Al-shabaab.
