KN: Waligaa miyaad maqashay “ninka bastoolada sameeyey ee isla bastooladii lagu diley?”, ma u maleeynaysaa in Maraykanka hub siinayo Muqaawanada?, hadaysa taasi dhacday ma isweeydiineysaa qaabka ay u dhacday?.
Dhawaaqa gambaleelada ama dawanka ayaa si aan kala joogsi lahayn oga dhawaaqaya caasimada wadamada reer galbeedka, dhawaqani waxa uu kasii darayaa marba marka dambeeysa saacadihii lasoo dhaafay, tani waxay ka dambeeysey kadib markii Maraykanka 40 tan oo hub ah geeyey Soomaaliya kaasoo gacanta u galaya xoogaga muqaawamada.
Qubaro iyo dublamaasiyiin reer galbeedka oo tirro badan ayaa soo saaray digniino culculus iyo fariimo dhiilo leh oo dhamaantood farta ku fiiqaya in hubka Maraykanka Soomalaiya geeyey uu ku dambeyn doono gacanta muqaawamada kadibna loo adeegsan doono isla Maraykankii geeyey.
Ragani ayaa talaabadani Maraykanka ku tilmaamay mid ismiidaamin ah oo aanan laga fiirsanin , waxay intaasi ku dareen in laga shalayn doono falkani, mar ay sababaynayeen aragtidooda ayay sheegeen in DKMG ah aysan lahayn astaamihii dowlada taageero heerkaasi ah la siin lahaa ama gacanteeda lagu aamini lahaa qalabka xaqmigaasi dhan, waxay intaasi ku dareen in DKMG ah aysan lahayn awood ay ku ceshato hubkani.
Digniintani waxay kaliftey in hubka qeyb ka hartay oo aanan wali la geeynin Xamar lagu xayiro bakhaaro keyd ah oo Uganda ku yaala sida laga soo xigtey illo wareedyo militari oo aanan dooneyn in la magacaabo.
Ka hor inta aysan dowlada bilaabin isticmaalka hubkani waxaa fariin cad Maraykanka u dirrey xoogaga muqaawamada oo wacad ku maray in ay hubkaasi ka furan doonan canaasiirta loosoo dhiibey.
Sh. Xassan Yacquub afayeenka maamulka islaamiga ah ee Kismaayo ayaa saxaafada u sheegey in hubkaasi uusan xasilooni ka dhalin doonin Soomaaliya, wuxuuna balan ku qaaday in ay furan doonaan hubkaasi, kadibna u isticmaali doonaan kuwa keeney.
Tan oo kale waxay dhacday sanadii 2006-dii markii Maraykanka hub iyo lacag badan siiyey hogaamiye kooxeedyadii arxanka darnaa ee Xamar heystey, kadibna golihii maxaakiimta ay hubkaasi furteen dhamaantii dalkana kula wareegeen intiisa badan.
