Boqolaal qoys oo degenaa xaafado ka tirsan Degmada Kaaraan ayaa bilaabay inay guryahooda ka barakacaan, kaddib markii ay u adkeysan waayeen duruufo dhinaca nolosha ah oo la soo gudboonaaday iyo cuna qabateynta maleeshiyada ururka Al-Shabaab ay ku soo rogeen dadka degan meelaha ay ka taliyaan, iyadoo saddexdii maalmood ee la soo dhaafay Degmada X/Weyne xaafado ka tirsan ay ku soo qulqulayeen qoysaskaasi horay u degenaa Demaga Kaaraan, iyagoo qaarkood aqallo cooshado ah ka sameystay bartamaha Degmada Xamar Weyne, gaar ahaan dhismayaashii ay magaalada Muqdisho caanka ku ahayd.
Dhismayaasha caanka ah ee Degmada X/Weyne ku yaalla oo dadka barakacayaasha ah ay degeen waxaa ka mid ah xaruntii Kaniisadda, Hotel Shabelle, Sulficar Ali Bhuto, Shinemo Misyooni iyo dhismayaal kale oo ku dhow, iyadoo dhismayaashaasi ay degeen qoysas ka soo barakacay xaafado ka tirsan Degmooyinka Kaaraan iyo Yaaqshiid kuwaasi oo u badan qoysas xoolo dhaqato ah.
"Waxaan ka soo qaxnay Kaaraan, Dowladeena sharafta leh waxaan ka dooneynaa inay dhibka aan ku jirno naga saarto" ayay tiri hooyo ka tirsan qoysaska ka soo barakacay degmada Kaaraan ee dhinaca Dowladda u soo raadsaday nolol, kaddib markii ay u adkeysan weysay amarrada iyo cadaadiska dhinaca nolosha ah ay kala kulantay ururka Al-Shabaab.
Degmada X/Weyne oo ka mid ah degmooyinka sida aadka ah ugu burburay dagaaladii sokeeye ee dalka ka dhacay 20-kii sano ee la soo dhaafay, waxaana degmadaasi oo ay ku yaalaan inta badan dhismayaasha qadiimiga ah ee Soomaaliya caanka ku tahay iyagoo uu ka muuqdo burburkii soo gaaray haatan isku bedelay xarumo ay degan yihiin qoysaska ka soo barakacaya degmooyinka G/Banaadir ee ay ka taliyaan ururka Al-Shabaab.
May Al-Shabaab suffer and go to jahanama
