Dr. C/llaahi Max’ed Faarax (Diihaal) “Haddii argagixisadii joogtay Xamar Washamsi lagu qaaday, Argagixisada ku harsan Kismaayo maxaa wax looga qaban waayey.?
Dr. C/llaahi Max’ed Faarax (Diihaal) oo ka mid ah siyaastiinta Soomaaliyeed ee qurba jooga ah, kana soo jeeda gobolada Puntland, ayaa isagoo ku sugan dalka Mareykanka, xiriir uu la soo sameeyey qeybaha kala duwan ee saxaafadda, wuxuu sheegay in Soomaalida Mareykanka badidood ay ahaayeen kuwii taageerada ugu badan la garab istaagay dowladda federaalka, ujeedada taageeradooduna ay aheyd in Qarankii Soomaaliya oo burburay dib loo yagleelo, iyadoo cidda hogaanka qabatana aan loo eegeyn shaqsi ama qabiil.
“Casharadii aan dowlad la’aanta ka baranay ee dhibaatada aheyd, ee sababtay in qofka Soomaaliga ah meel kasta oo adduunka ah laga naco, qofka dhibaatadaasi dareemi kara waxaan qabaa in uu leeyahay xittaa qofkeena ugu liita wax inooga dhiga, waayo, dowlad xun baa dhaanta dowlad la’aan” ayuu yiri Dr. C/llaahi Max’ed Faarax Diihaal, wuxuuna intaasi raaciyey in kooxaha ka soo horjeeda dowladda federaalka in ay iska daayaan arbushaada, ayna fursad siiyaan dowladda federaalka si ay u gudato waajibaadkeeda.
Dr. Diihaal, wuxuu sheegay in wixii ka danbeeyey markii ay dowladda federaalku la wareegtay gacan ku haynta caasimada Muqdisho, in ay jiraan dad badan oo is-weydiinaya, su’aal ah, haddii firxadkii argagixisadu ay weli ku harsan yihiin magaalada Kismaayo, ayna halkaasi ka wadaan fowdo, sababta ay dowladda federaalku ay wax uga qaban la’dahay arrinta Kismaayo.
Argagixisada joogta Kismaayo maxaa wax looga qaban waayey,? Ayuu is-weydiiyey Diihaal, isagoo dhinaca kalena sheegay in dad badan ay u fahmi karaan haddii argagixisadii Xamar joogtay Washamsi lagu qaaday, sababta loo dhowranayo tan Kismaayo, waxaana dadka ay u fahmi karaan sababta in ay tahay arrin qabiil.
“C/llaahi Yuusuf waa oday Soomaaliyeed oo nabad-doon ah, wuxuuna doonayaa in sharaftii & Qaranimadii Soomaaliya intii karaankiisa ah uu soo celiyo haddii ay Soomaalidu intaa la fahamto, mana ahan nin ujeedadiisu tahay in uu hanti uruursado, wuxuu doonayaa haddii ay Soomaalidu la shaqeyso in Qarankii Soomaaliyeed uu soo celiyo, talada & masiirka ummaddana uu Soomaaliya dhex-keeno” ayuu yiri Dr. Diihaal, wuxuuna kula taliyey madaxweynaha & ra’isul wasaaraha in shaqsiyaad karti, aqoon & wadaniyad-ba leh in loo dhiibo xilalka muhiimka u ah dowladda federaalka.
Dr. C/llaahi Max’ed Faarax (Diihaal) oo todobaadkii hore magaalada magaalada Chicago (IL), kulan kula yeeshay Senator Brack Obama oo ah musharax Mareykan madow ah, una taagan doorashada madaxtinimada dalka Mareykanka, ayey ka wada-hadleen doorka dowladda Mareykanka ee ku aadan arrimaha Soomaaliya, wuxuuna sheegay in uu u gudbiyey Obama talooyin muhiim ah oo ku saabsan xaalada Soomaaliya, una balanqaaday in uu tallooyinkaasi hor geyn doona aqalka Senet-ka Mareykanka.
Wixii fikir ah oo aad warbixinta Diihaal ka qabto, halkan ugu dir jawaaba cabdulahif@gmail.com
