Shirka kadhacay magaalada Minneapolis oo ay isugu yimaadeen Jaaliyada gobolka Sanaag, Bari, iyo Jubada Hoose
------------------------------
Minneapolis: Shir ka dhacay magaalada Minneapolis oo ay isugu yimaadeen jaaliyada Gobolka Sanaag, Bari iyo Jubada Hoose ayaa lagu arinsanayay dib u dhiska Dekeda Laasqorey. Waxaa madasha Shirka Soo abaabuley iskuna soo daba ridey Gudoomiyeha Hay’ada Horn relief ee woqooyiga Mareykanka Ibraahin Maxamed Huruuse (Ibraahin Dheere) waxaana xiriiriye ka ahaa Shirka Dr. Cabdifataax Xuseen Dheere.
Shirkan oo ay kasoo qeyb galeen boqolaal qof ayaa Ugu Horeyntii waxaa shirka kalmado qiimo leh ku furey Sheekh Abdulqaadir abdi Aadan oo Sadaqada ku booriyey umadii kasoo qeyb gashay yirina “nabiga (c/s/w) ayaa arkey nin geed wadada ka gooyey, kadibna yiri ninkaasi janada ayuu galay. Bal ka waran ninka Deked dhisa oo wadooyin misna sii dhisa. Ajarka aad intaa ka filayso ayaa ah mid aad u badan” ayuu yiri Sheekh Abdulqaadir.
Waxyaabaha dadka ay u riyaaqeen aadna ugu baraarugeen ayaa waxaa ka mid ah Nidaamka ay Horn Relief wax u soo abaabuleen iyo sida ay ugu cusubtahay qaarada Afrika in ay Community “Jaaliyad” dhistaan deked ka madax banaan gacan dowladeed iyo maamul.
Goobtii shirka ayaa waxay dadweynuhu safuuf u galayeen si ay lacagta dib u dhiska dekeda u bixiyaan deeqdaas oo ugu yareyd qafka bixinayay lacag gaareysa KUN DOOLAR QOFKIIBA. Sidoo kale Dr. Abdulqaadir Xirsi ayaa goobtii shirka ku bixiyey deeq gaareysa laba kun oo doolar, wuxuu kaloo balan qaadey lacag gaareysa labaatan kun oo doolar. Dr. Abdulqaadir wuxuu kaloo sheegay in nin walba oo u dhashay beesha Warsangali looga baahanyahay inuu ka badsado lacagta la isku qorey oo ah “Kun doolar” bixiyana ugu yaraan shan kun oo doolar. Sidoo kale Abwaan Cismaan Maxamed Gurey ayaa isna wuxuu goobtaasi wuxuu ku bixiyey lacag gaareysa “shan kun oo doolar”, wuxuu kaloo balan qaadey in uu beesha uu ka dhashay “Jibriil Siciid/Warsangali” lacaga ku aadan bixin doono gabi ahaan.
Waxaa qadka tilifoonka lagu soo xirey madaxa Hay’ada Horn Relief Faadumo Jibriil, oo sheegtey in ay hada Survey labaad loo direy dekeda Laasqorey. Waxay sheegtey in hay’ada Care ay balan qaadey in ay sameyn doonto Cabiraada biyaha, ciida mugeeda, iyo dhagaxa biyaha lagu buuxinaaya iyo dhagaxa noociisa ayay ka faalootey. Faadumo waxay qurba joogta ka codsatey in ay bixiyaan lacagaha, wax qabadka badiyaan, su’aalahana ay yareeyaan oo aan macnaha badan sheegeynin. Dadka dalka gudihiisa jooga ayay sheegtey Faadumo in ay aad ugu howlanyhiin wax qabadka dekeda Laasqorey. Waxaa kaloo isna Qadka telefoonka lagu soo xirey Xassan Maxamuud Samatar oo jooga magaalada Badhan oo isna ka faalooday in ay ku howlan yihiin dhisme maamul loo sameeyo deegaanka Gobolka Sanaag. Mudane Xasan ayaa sheegay in sidoo kale xafiisyadii magaalada Laasqorey oo ay Hay'ada ka howl galidoonto dhisme lagu wado. wuxuu kaloo tilmaamay in ay howlaha badanyihiin iyo sida ay muhiim u tahay in ay qurba joogta kaalintooda kasoo baxaan.
Abwaan Siciid Saalax ayaa suugaan badan ka jeediyey sheegayna in ay Soomaalida dhaqan u lahayn wax isku darsiga sidaa darteed shaki keeni karta wax isku darsiga. Waxaa kaloo gabayo iyo Buraanbur ka jeediyey goobtii shirka Caasha Abdi Axmed oo dareen qiiro galisey dadweynihii kasoo qeyb galay shirka.
Inkastoo aanan halkaan kusoo koobi Karin oo aad uga bogan doontaan sawiro iyo warbixino cod ah dadkii ka hadlay shirkaas oo socday mudo sideed saacadood ah ayaa waxaa ka mid ah: Profesor Maxamud Cabdi Nuur, Generaal Cabdulaahi Ilka jiir, Dr. Siciid Shaacir, Col. Jaamac Shire, Col. Maxamed Cabdi Qaac. Profesor Abshir Aw-yuusuf, Kadiye Cali Huniye, Sahra Maxamed Xaaji, Faadumo Cali Ciid, Caabi Faarax, Gabayre Jaahweyn.
http://www.dhahar.com/article.php?articleid=1421
and if you open it, it tumbles out and dirties the whole area.
