Banaanbax ay maanta Muqdisho ka sameeyeen ehelada 5 haween ah oo xalay ciidamada dowladda ay kufsadeen
Mogadishu 26, July 07 ( Sh.M.Network) Banaanbax looga soo horjeedo falal kufsi iyo jirdil ah oo oo xaley ciidamada dowladda ay ka geysteen xero dadka soo barakacey ay ku nool yihiin oo ku taala agagaarka Shineemo Puntland ee degmada Huriwaa, ayaa saaka ka dhacey wajahadda hore ee Hotel Lafweyn ee magaalada Muqdisho.
Banaanbaxan oo ay soo qaban qaabiyeen qaar ka mid ah ehelada illaa 5 haween oo ciidamada dowladda ay kufsadeen xaley ayaa waxaa uu ahaa mid ay kaga cabanayeen falal jir dil iyo kufsi ah oo ay sheegeen in ay kula dhaqaaqeen ciidamada dowladda.
Dibadbaxayaasha oo lagu qiyaasey illaa iyo afar boqol ayaa socodkooda ka soo billaabey waddada dheer ee hor marta hotel Ramadaan iyagoo isugu soo ururey waddada hotel Lafweyn, waxaana ay ku qeylinayeen hal ku dhigyo ka dhan ah ciidamada dowladda.
Dibad baxayaasha ayaa waxaa sidoo kale ku jirey qaar ka mid ah haweenkii jirdilka iyo kufsiga loo geystey oo qaarkood dusha ku sitey ilmo bil ka yar, oo wajiyadooda ay ka muuqdey dhibaato iyo murago la xiriirta amarka qabsadey.
Muumino Max’ed oo ka mid ah haweenkii la kufsadey islamarkaana ay sheegtey in ay tahay umul ayaa tilmaamtey in ay u soo galeen guriga xaley ciidamo aad u fara badan islamarkaana ay kufsadeen illaa iyo 3 ka mid ahaa ciidamadii u soo galey.
“ Waxaa ii soo galey ciidamo ku lebisnaa dharka cagaarka ah, waa ay igaraaceen waxayna ninkeyga ku amreen in uu banaanka tago” ayey tiri Muumino.
Sidoo kale Nuurto Xaaji Aadan oo ka mid aheyd haweenkii la kufsadey ee ayaa sheegtey in jirdil loo geystey ka hor inta aan la kufsan.
Aadan Cismaan oo ah seyga mid ka mid ah haweenka la kufsadey oo la yiraahdo Muumino Max’ed oo isna Shabelle ugu waramey goobta uu dibad baxa uu ka dhacey ayaa waxaa uu sheegey in ay jirdil u geysteen ciidamadii u soo galey islamarkaana ka xumaadey falkii lagula dhaqaaqey xaaskiisa.
“Waxaa ay igu qabteen qori xaaskeygana horteyda ayey ku kafsadeen” ayuu yiri Aadan Cismaan oo intaasi ku darey in dareen ahaan uu is badeley markii ay dhacdey arintani.
Dibaxayaasha ayaa markii dambe waxaa kala eryey ciidamo ka tirsan dowladda Somalia iyagoo diidey in wax codsi ay dowladda u jeediyaan taasoo ku aaddan dhacdadan ay ciidamada dowladda kula dhaqaaqeen.
Waxaa ay ka codsadeen hay’adaha xaquuqul insaanka in arrinkaasi ay baaris ku sameeyaan islamarkaana sharciga la horkeeno askartaasi.
Dhacdadan ayaa waxaa ay ku soo beegmeysaa xilli ciidamo ka tirsan dowladda Somalia ay waayahanba soo baxayeen eedeymaha la xiriira in ay dhac ka geystaan suuqyada Muqdisho,iyadoo tanina ay noqoneyso dhacdo cusub oo lagu eedeynayo ciidamada dowladda.
Ciidamada Ethiopia ayaa hore loogu eedeeyey in ay kufsi iyo jir dilba u geysteen illaa iyo labo haween ah oo ku dhaqnaa magaalada Muqdisho, mana jirin wax hadal ah oo dowladda ay ka soo saartey dhacdooyinkaasi.
Shabelle Media Network Somalia
E-mail us: info@shabelle.net
