http://somaaljecel.com/SjDynews/LatestD ... =406&page=
Shalay Muqdisho maxaa ka dhacay…..?
{Somaaljecel News Network} Muqdisho:- Shalay Arbacadii oo taariikhdu ahayd 5-ta bisha Agosto sanadka 2007 ayaa wacdaro iyo layaab aan muddooyinkan dambe lagu arkin caasimadda Muqdisho waxa ay ka dhacday Suuqa Bakaaraha ee magaalada Muqdisho oo shalay ahayd goob ay ku hardameen ciidamada dowladda KMG iyo kooxaha ka soo horjeeda.
Tan iyo intii ay gacan ku heynta magaalada Muqdisho la wareegtay dowladda KMG ma dhicin, lamana arkin kooxaha ka soo horjeeda dowladda KMG oo dharaar cad iyagoo hubkooda iyo udbahooda sita ka dhex dagaalamaya faras magaalaha magaalada Muqdisho, waxaana mar qura xaafadaha Muqdisho laga maqlay “ALLAAHU AKBAR”.
Afarta Jiho ee magaalada Muqdisho ayay mar qura ka soo kala yaaceen kooxo aad u hubeysan oo hubkooda iyo rasaastoodu ay u idishahay kuna soo talo galay dagaal is difaacid iyo badbaadin nin saaxiibkood ahaa oo ciidamada dowladdu ay doonayeen inay gurigiisa kala baxaan.
Mar qura ayay isgaarsiintu shaqeysay, meel kasta oo ay kooxahaasi Muqdisho ugu kala sugnaayeen ayay ka soo kicitimeen iyadoo laga yaabay cidda diyaarka kawada dhigtay oo markii seeriga isgaarsiinta uu gaarayba daqiiqado gudahood ku soo gaaray goobtii saaxiibkood lagu harreereeyay oo ahayd hoygiisa oo ku yaala suuqa Bakaaraha ee magaalada Muqdisho agagaarka Boosteeda Bakaaraha ee laga raro Basaska Dadweynaha ee degaanka Gubta ka shaqeeya, markiiba ciidamadii guriga saaxiibkood ku hareereysnaa ayay kor ka sii hareereeyeen, Koox kale oo hubeysan oo aan tiro badnayn oo gudaha guriga ku jirtay ayaa iyagana rasaas ku soo rideysay ciidamada dowladda oo sii difaacaysay Sheekha ciidamadu ay doonayeen in ay guriga kala baxaan, mar qura ayay rasaastii is qabsatay ciidamadii dowladda “O” ayay galeen oo horey iyo gadaal ayay rasaas looga soo riday, Kabtey ma aragtay ayaana ka dhacday oo askari meel lagu sheegaa waa la waayay xitaa meydkooda iyo dhaawacyadooda way ka kala carareen.
Kooxihii hubeysnaa ee sida bareerka ah dagaalka difaacidda Saaxiibkood ah ciidamada ugu soo qaaday si fudud ayay Sheekhii ay badbaadsanayeen ula bexeen lana beegsadeen goobihii ay ka soo howl galeen oo cid garan kartaa aysan jirin.
Ciidamadii dowladda ee laga itaal roonaaday meel ay jaan iyo cirib dhigeen ayaa la waayay, kooxihii hubeysnaa iyagoo hubkooda garwaaxeedsan ayay gaaf wareegayeen nawaaxiga suuqa bakaaraha iyo qeybo ka mid ah duleedka suuqa oo ay difaac kaga jireen, kadibna goobahoodii si xor ah isaga laabteen.
Ciidamadii dowladda markii qaddar daqiiqado ah ay sii maqan yihiin kooxihii hubeysnaa ayay iyagii iyo kuwo kale oo lagu soo kordhiyey goobtii dagaalku ku qabsaday yimaadeen, gurigii Sheekha oo cidlo ah inta galeen ayay baaris ku sameeyeen, kadibna la sheegay in xanaaq dartii ay dab u qabadsiiyeen isagana tageen.
Ciidamo Itoobiyaan ah ayaa saacad iyo bar kadib goobtii yimid mar xeero iyo fandhaal kala dheceen oo kooxihii dowladda ka soo horjeeda ay nasiinno iyo damaashad ku jiraan, baaritaan ayayna xaafadaha ku dhow dhow suuqa ka sameeyeen ciidamadii Itoobiyaanka iyo kuwa dowladda KMG oo wada jira.
Waxaa arrin layaab leh noqotay in maalin cad oo awoodda Muqdisho ay gacanta ku hayaan ciidamada dowladda KMG in kooxaha dowladda ka soo horjeeda iyagoo hubabkoodii iyo booshadahoodii wata ay weerar aan gabasho iyo gaadmo ahayn ku soo qaadaan ciidamada dowladda, kadibna si xor xaafadaha Muqdisho u dhex maraan iyadiyoo weliba dalka ay joogaan ciidamada sida aadka ah u hubeysan ee Itoobiya oo garab siiya ciidamada dowladda KMG, kooxahaasoo aan ciidamada Itoobiyaanka xitaa ka baqin.
Tani waxay rajo tirtay dowladda KMG Soomaaliya, waxayna soo celisay hamigii dadka Muqdisho ee Maxkamadaha islaamiga taageersan, iyadoo inta badan dadka Muqdisho ay dhibsadeen ciidamada dowladda oo aan wax arxan ah u samayneynin shacabka, taasoo keentay in kooxihii shalay taageero sacab tumis ah lagu soo dhaweeyay
