Hub Ka Dhigis Balaaran Oo Lagu Sugayo Ammaanka Oo Ka Socota Magaalada Kismaayo
Oct 12,2007
by Kismaayo-GEDO-NN
Boqolaal ka mid ah ciidamada amniga ee maamulka gacanta ku haya gobollada jubbooyinka ayaa ka wado magaalada Kismaayo baaritaano hub ka dhigis ah oo qeyb ka ah suggida amniga magaalada.
Ciidamadan ayaa la sheegay in howlgalkooda ka fuliyey xaafadaha magaalada Kismaayo, iyadoo ciidamo koox koox u socdaa oo ay tageerayaan gawaarida tiknooyinka oo guri guri u baaraya sida ay sheegeen masuuliyiinta dhanka ammaanka ee u qaabilsan gobalka jubbada hoose. Howlgalkaan ay fuliyeen ciidamada aminga ayaa la sheegay in sii socon doono in muddo ah, iyada oo la soo rogay amar ah in hubka magaalada ku dhex wadan karaan oo kaliya ciidamada qaabilsan dhanka amniga.
Ciidamada amaanka magaalada Kismaayo oo hawlgalada ay sameeyeen ay ka mid yihiin hubkadhigis ay ku samyeen maleeshiyooyinka hubaysan ee aan cidina ka amar qaadan oo ayaguna qeyb ka ah falalka amni darada ee marmar ka dhaca magaalada Kismaayo.
Masuuliyiinta maamulka gacanta ku haya magaalada gobollada jubbooyinka oo shirar isdaba joog ah u fadhiyay ayaa qaar ka mid ahi ay sheegeen inaysan marnaba u dulqaadin doonin kooxaha doonaya inay khalkhal galiyaan amniga iyo wado degaanasha magaalada, ayna dhowaana soo saari doonaan talaabooyin si rasmi ah loogu soo afjarayo dhibaatooyinka salka u ah colaadaha dabo dheeraaday ee in muddo ka jiray gobollada jubbooyinka.
Dhanka kale, masuuliyiinta ku sugan magaalada Buaale ee gobalka jubbada dhexe oo ka warbixiyey weerar baasuke ah oo lala beegsaday baabuur ka yimid magaalada Kismaayo oo shalay ku sii jeeday magaalada Baardheere ayaa sheegay inay aad ugu xun yihiin dilka soo gaaray labo qof oo shacab ah oo ka mid yahay milkiilahii gaariga la weeray, ayna wado xaajood la bilaabayaan ehelada labada qof ee dhimatay oo ku sugan magaalada Baardheere.
Masuulkan ku sugan magaalada Buaale ayaa marka hore u tacisiyeey eheladii labadii qof ee geeriyootay, sidoo kale sheegayna in kooxahii falkaan geystay ay iyaga oo kaliya ay ka masuul yihiin oo shacabka magaalada Buaale ay raali ka aheyn talaabooyinka noocaan oo kale oo wax u dhimaya xiriirka ka dhaxeeya beelood.
GEDO-NN-Kismaayo News Desk