Askari ka tirsan Ciidamada ammaanka ee Magaalada Kismaayo ayaa Maanta toogtay mid kale xilli ay Kismaayo ka socdaan hawl-gallo balaaran oo ay wadaan Ciidamada sida gaarka loogu xilsaaaray sugida amniga.
Askariga la dilay oo la oran jiray Asad Cali Gurxan ayaa waxaa uu ku sugnaa xaafada Farjanno markii uu toogtay askari kale oo ay hawl-gal kuwada jireen, sida uu sheegay Nabadoon Cabdi Warsame Gurux, gacan ku dhiiglaha ayaa lagu xiray saldhiga Booliiska ee Kismaayo.
dilka askarigaan oo noqonayay kii ugu horeeyay ee ka dhex dhaca Ciidamada ammaanka ayaa waxaa uu yimid saddex maalmood ka dib markii askari kale oo ka tirsanaa ciidanka ammaanka kismaayo uu dilay nin hubaysnaa oo ay utaalay jidgooyo duleedka waqooyi ee Kismaayo.
odayaasha iyo waxgaradka Beelaha ay ka soo kala jeedaan ninka wax dilay iyo kan la dilay ayaa wada dadaal ay ku qaboojinayaan xiisad laga yaabo in ay ka dhalato dilka Askariga oo ku soo beegmay xilli ay qisaas ay wada go'aansadeen juffooyinka Beesha Sade si loo xakameeyo Maleeshiyooyinka.
Boqolaal maleeshiyooyin ah ayaa jidgooyooyin isdabayaala waxaa ay dhigteen wada u dhaxaysa magaalooyinka Kismaayo iyo Jilib halkaas oo ay cariiri galiyeen isu socodka gaadiidka dadwaynaha oo qaarkood ay cunnooyinka daruuriga ah ay u sidaan tuulooyinka halka kuwa kalen ay khudaarta ka soo qaadaan deegaanada Gosha ee jiinka wabiga Jubba.
ugu yaraan afar ka mid ah maleeshiyooyinkaan ayaa geeriyootay tan iyo bishii April waxaana dilay kuwa kale oo ay isbaaro utaalay iyadoo ilaa iyo iminakana la toogtay laba ka mid ah oo dilal ka gaystay isbaarooyin ay joogeen.
Gudaha Kismaayo waxaa ay dadwaynuhu soo dhawaynayaan hawl-galada ciidamada ammaanka oo horseeday in ay yaraadaan falalka ka dhanka ah ammaanka ee lala beegsado dad shacabka xilliyada ay dukaamaysanayaan iyo habeenkiiba.