Prof. Geedi oo gacmaha isku galiyay Safiirada Kenya u fadhiya Somalia iyo Eritrea.
10 Feb 08 - Kulan xasaasi ah ayaa hoyga Ra'iisul-wasaarihii hore ee Somalia Prof. Cali Maxamed Geedi waxa uu xalay ku dhex maray safiirada Kenya u fadhiya dowladaha Somalia iyo Kenya, Maxamed Cali Ameerika iyo dhigiisa Eritrea u fadhiya dalka Kenya
Kulankaan ayaa ahaa mid xasaasi ah isla markaana ay albaabada u xirnaayeen, waxeyna labada dhinac ka wada hadleen qaabkii arrimo qaas ah oo aan la faafin.
Ra'iisul-wasaare Geedi ayaa ah ninka xilka Safiirnimo u dhiibay Cali Ameerika, isagoo hada qirsan maadaama uusan aheyn Ra'iisul-wasaare in xilka safiirnimo laga qaadi doono Cali Ameeriko oo ay ehel yihiin.
Geedi ayaa ku qalqaaliyay Cali Ameeriko inuu heshiis hoose la galo Dowlada Eritrea, kadibna uu la heshiiyo Isbaheysiga Xoreynta dalka Somalia ee xaruntiisa tahay magaalada Asmara ee dalka Eritrea.
Cali Ameeriko iyo dhigiisa Eritrea ayaa lasoo warinayaa inay is gacan qaadeen, kuna heshiiyeen wada shaqeyn inta uu xilka safiirnimo uu hayo Cali Ameerika.
Mid kamid ah shaqaalaha safaarada Somalia ee dalka Kenya oo diiday in magaciisa la daabaco ayaa sheegay inuu Cali Ameerika uu qadka Telefoonka kula hadlay Guddoomiyaha Isbaheysiga Xoreynta dalka Somalia Sheekh Shariif Sheekh Axmed isla markaana ay gaareen heshiisyo aan la ogeyn waxa ay ku saabsan yihiin.
Cali Ameerika ayaa xilka waxaa ka qaaday Wasiirkii hore ee arrima dibada Ismaaciil Buubaa kadib markii lagu ogaaday inuu lacago ka qaado dad Soomaali ah, kadibna uu raaciyo wafuuda Dowlada KMG ah ee wadamada Yurub u socdaala, balse waxaa arintaasi gaashaanka u daruuray Ra'iisul-wasaare Geedi oo ay ehel yihiin mar kalena magacaabay.
Warar maalmihii ugu dambeeyay suuqyada aadka loogu hadal hayay ayaa sheegayay Xasan Rooble oo u qaabilsan Safaarada Somalia ee Kenya dhinaca Baritakoolka, inuu Talyaaniga geeyay dhalinyaro Nairobi joogtay oo beesha Abgaal kasoo jeeda, kuwaaso laga qaaday lacago yar.
Xasan Rooble ayaa kamid ah shaqsiyadaadka Visooyinka siiya dadka Soomaalida ah ee Kenya jooga kadibna ka qaata lacagaha, iyadoo dadka yaqaana ay sheegaan inuu yahay nin qabyaalada aad u daneynaya isla markaana erya dadka aan qabiilkiisa aheyn.
Maalmihii ugu dambeeyay waxaa soo ifbaxayay khilaafaad hoose oo u dhaxeeya Madaxweyne Cabdilaahi Yuusuf iyo Safiir Ameerika, taasoo salka ku heysa dad lacago laga qaatay oo la raaciyay wafuuda Dowlada KMG ah ee Yurub u socdaasha.
Hadal Madaxweyne Yuusuf uu dhawaan yiri ayaa lasoo warinayaa inuu ahaa "Ameerika xafiis muqalasnimo ayuu ka dhigay safaarada Kenya aan ku leenahay, waana la socdaa, aniga xitaa dad aan aqoon ayuu diyaaradeyda London aan ku tagay raaciyay, balse xilkiisa ayuu ku weyn doonaa maalmaha dhow cid badashaan raadinayaa".
Si kastaba ha ahaatee, kulankaan dhex maray safiirada Somalia iyo Eritrea u fadhiya magaalada Nairobi ayaa kusoo beegmaya xili dhawaan lagu wado inuu gaaro magaalada Asmara Ra'iisul-wasaare Nuur Cadde oo daneynaya inuu wada hadal la furo kooxda kasoo horjeeda Dowlada Federaalka ee xarunta u ah magaalada Asmara.
