--------------------------------------------------------------------------------
(Badhasaabka Togdheer oo Xadhigga ka Jaray Dhisme Cusub oo Akadamiga Nabaddu ka Hirgeliyey Burco )
hadhwanaag 2008-07-10 (Hadhwanaagnews) Badhasaabka Gobolka Togdheer Jaamac C/llaahi Biin ayaa maanta xadhigga ka jaray dhisme cusub oo Akadamiga Nabadda iyo Horumarku ka hirgaliyay magaalada Burco.
Guddoomiyaha oo munaasibaddaa xadhig goynta dhismayaasha cusb ka hadlay ayaa sheegay inuu si weyn u soo dhoweynayo, xarunta Akadamigu ka dhisatay magaalada Burco, isagoo tilmaamay in dhismahani ka mid yahay guriyihii dawladda ee burbursanaa ee kharaabadaha ahaa, haddana ay ku faraxsan yihiin sida wanaagsan ee dib-u-dhiska iyo dayactirka loogu sameeyay.
Waxaannu intaa raaciyey in Akadamigu waxbadan oo dhinaca nabada ah ka qabtay degaanka Togdheer, haddana uu rajaynayo inay ka sii kordhin donaan oo dedaalka waxqabadkooda sii labanlaabaan.
Ugu dambeyntiina waxa uu Badhasaabku u mahadceliyay masuuliyiinta xafiiska Akadamiga, isagoo ballanqaaday inay gacan ka siin doonaan wixii ay maamul ahaan uga baahdaan.
Madaxa xafiiska Akadamiga ee Gobolka Togdheer Mr.Cali Cige ayaa isaguna xusay in xafiiskani yahay kii koowaad ee laga furo gobollada, isla markaana hawlaha ay qabtaan ay ka mid tahay xasillinta mushaakilaatka iyo khilaafaadka bulshada soo kala dhexgala, "Isku soo jiidista iyo gogoldhigida ayaanu u samaynaa".
Waxaannu Mr. Cali ballanqaaday inay dadaalkooda iyo waxqabadkooda sii kordhin doonaan, isagoo u mahadceliyay Madaxweynaha iyo Wasiirka Hawlaha Guud oo uu sheegay inay u oggolaadeen dhismahan inay dhistaan.
Waxa kale oo isna halkaa ka hadlay Mr.Siciid Axmed Maxamed oo ka tirsan masuuliyiinta Sare ee Akadamiga, waxaanu sheegay in xafiiska Akadamigu hore uga furnaa Burco, haseyeeshee ku jireen guri karo ah, maantase ay dhisteen xarun cusub.
"Akadamigu muddo toban sanno ah ayuu shaqeynayay, waxaanu hawsha ku bilownay safar dheer oo aanu ku tagnay min Lowyacaddo ilaa Laasqorey, kaasoo ujeeddadiisu ahayd sidii xogogaal u noqoshada xaaladda bulshada, kadibna xogihii aanu ka soo ururinay waxaanu ka samaynay buug, buuggaasina waxa uu noqday mid faa,iido iyo waxtar weyn yeeshay,"ayuu yidhi Mr. Sicidi Axmed, waxaannu xusay inay Akadamigu yahay goob lagu ururiyo xogaha iyo taariikhaha Somaliland si aanay u limin.
Waxa kale oo Mr.Siciid waxa uu tilmaamay inay marka murug siyaasdeed yimaad ay kaalin ka qaataan isu keenidda iyo wada fadhiisiinta, isla markaana ay qabtaan doodo laysku waydaarsanayo aaraahda iyo fikradaha,"Sidaa darteed xarunta Akadamiga iyo Nabaddu waa goob dhexdhexaad ah," waxaannu si gaar ah ugu mahadceliyay dhammaan dadweynaha iyo masuuliyintii kala duwan ee ka qaybgalay xafladda.
Dhismahan cusub ayaa waxa ku baxay dhaqaale gaadhaya lixdan kun oo dollar, waxana fulisay shirkadda Urban Conastarction Co. oo ka mid ah shirkadaha dhismayaasha ee ugu caansan Gobolka Togdheer, kadib markii ay ku guulaystay tartankii qandaraaska oo ay qaybgaleen shirakado tiro badan.
Xafiiska Akadamiga ee Burco ayaa gacan ka gaysta wax-ka-qabshada xasillooni-darrada ku timaadda nabadda, sidoo kale waxa uu tababarro u qabtaa cuqaasha, Booliska, dhallinyarada, xildhibaannada degaanka iyagoo siiya tababaro la xidhiidha xallinta imushaakilaadka ka dhasha khayraadka dabiiciga iwm.
Keyse Axmed Digaale
Kdigale@yahoo.com
Burco , Somaliland
