Dagaal ka dhacay Gobolka J/hoose oo ay ku dhinteen dad gaadhaya 10 qof iyadoo tiro intaa ka badana
Warkii 18-Jul-2008 iyo Qormadii: Afnugaal News Desk
Waxaa laba maleeshiyo beeleed oo ku dagaalamaya meel qiyaastii magaalada Kismaayo 100km u jirta kagana beegan Galbeedka ku dhexmaray dagaal keenay khasaare xoogan dagaal kaas oo ku bilaabmay si kadis ah kadib waan waan maalmihii lasoo dhaafay laga dhex waday labada beelood ee halkaasi wada dega iyadoo ay kala tirsanayeen aanooyin hore.
Dagaalkan ayaa waxaa ku dhintay ugu yaraan 10 qof halka 15 kalena ay ku dhaawameen dagaalka u dhaxeeya labada Beelood oo kala dega Tuulooyinka Buriyo iyo Baqdaad waxaana hadda goobihii ay dagaaladu ka dhaceen ku sugan Odayaal dhaqameed isku dayaya inay joojiyaan colaadan marba marka ka danbaysa sii xoogaysa.
Maalmii lasoo dhaafay ayaa waxaa tuulooyinka Buriya iyo Baqdaad ku sugnaa Odayaal dhaqameed doonayay inay halkaasi ka dhaliyaan nabad ay ku wada nooladaan labada Beelood ee wada deegaankaasi iyagoo labadaasi beelood ay horay ukala tirsanayeen aanooyin qabiil oo marba keenaysay in colaadu dib u cusbaanooto.
Waxaa mar kaliya jabay waan waantii laga dhex waday labada Beelood ee halkaasi wada dega waxaana ka bilaabmay dagaal keenay khasaarooyin kala gedisan oo naf iyo maalba leh inkasta oo hadda wararka naga soo gaadhaya ay sheegayaan in goobtii dagaalku ka qarxay ay dagan tahay ayna jirin hadda wax dagaal ah oo socda kaas oo u dhaxeeya labada Beelood.
Hadaba Gobolka J/hoose ayaa waxaa inta badan kusoo noqnoqda dagaalada noocan oo kala ah kuwaas oo u dhaxeeyay Beelaha wada deegaankaasi iyadoo sidoo kalena ay halkaasi ka jirin maamul isku daya inuu joojiyo colaadahan soo noqnoqda iyadoo uu Gobolkaasi noqday meel inta badan ka dhacaan rabshado.
Afnugaal News Desk
info@afnugaal.com
