Djibouti, January 28, 2009 (Haatuf) – Shirkadda Xawaaladda lacagta ee Dahabshiil ayaa ka heshay dawladda Djibouti ruqsad ama fasax bangi islaami ah, kaas oo uu u dhan yahay dhamaan sharciyada iyo shuruudaha ay ku hawl galaan bangiyada Islaamiga ahi.
Bangigan ayaa sida lagu sheegay warsaxaafadeed ka soo baxay shirkadda Dahabshiil waxa uu hirgalin doonaa adeegyo kala duwan sida adeega Warqadaha Ruqsadaha Ganacsi (LC’yada) Maalgelinta, kaydinta lacagaha iyo waxyaabo kale.
Waxaana uu u qornaa warsaxaafadeedku sidan:-
“Shirkadda Dahabshiil oo Liisan Bangi Islaami ah ka Heshay Dawladda Jibouti
Waxa aannu la socodsiineynaa macaamiishayada sharafta leh, iyo guud ahaanba bulshaweynta iyo ganacsatadaba, in shirkadda Dahabshiil ka heshay Dawladda Jibouti ruqsad ama liisan Bangi Islaami ah oo uu u dhan yahay sharciyaddiisii oo idili.
Bangigu waxa uu u fidin doonaa macaamiishiisa dhammaan adeegyada bangi islaami ah sida Warqadaha ruqsadaha ganacsi (LC’yada), maalgelinnada, kaydinta lacagaha iyo waxyaabaha kale ee qaaliga ah, furidda xisaabaha socda (current accounts) iyo isu-gudbinta lacagaha.
Bangiga Dahabshiil waxa uu adeeggiisa ku baahin doonaa dhammaan gobollada dalka marka u horreysa ee sharciga waddanku u fasaxo.
Bangiga Dahabshiil waxa uu noqon doonaa bangi saamile ah oo dadweynaha iyo ganacsataduba ku yeelaan doonaan saamiyo waafaqsan shuruucda bangiyada Islaamiga ah ee caalamka.
Bangiga Dahabshiil waxa aasaaskiisa ka dambeeya shirkadda Dahabshiil, oo xarunteedu that Dubai, UAE. Shirkadda waxa muddo labaataneeyo sannadood si weyn looga bartay adduunweynaha iyada oo haatan adeeggeedu ku baahsan yahay caalamka oo idil. Shirkaddu waxyaabaha ay ka shaqayso waxa ka mid ah isu-gudbinta iyo isu-diridda lacagaha iyo sarrifka lacagaha qalaad; waxana ay, isla markaa, leedahay qaybo ganacsiga guud ah; iyada oo weliba saami mug leh ku leh shirkadda isgaadhsiinta ee SOMTEL.
Shirkadda waxa bishii November 2008 guddoonsiiyey abaalmarin caalami ah Guddoomiyaha Ururka Caalamiga ah ee IAMTN, Lord Lamont, oo fadhigiisu yahay London, UK.
