Dowladda Soomaaliya oo sheegtay inay bilowday dagaal qorsheysan oo ay Muqdisho kula wareegeyso.
Dowladda KMG ee Soomaaliya ayaa maanta shaaca ka qaaday inay bilowday dagaal qorsheysan oo ay shacabkeeda ku bad baadineyso, isla markaana ay ku sifeyneyso mucaaradka ka soo horjeeda oo ay ku tilmaantay kuwo shisheeye u adeegaya, kana amar qaata ajaaniibta la socda.
Wasiirka Gaashaandhiga Dowladda Soomaaliya Prof. Maxamed Cabdi Gaandi ayaa sheegay in dagaaladan ay yihiin sidii uu u bilowday, ilaa ay kula wareegto gacan ku heynta Caasimada.
"Ciidamada Qaranka ayaa dagaalada saakay qaaday meelo badan ayay kula wareegeen, dagaalka waa sii soconaa, ilaa laga sifeeyo kooxaha naga soo horjeeda"ayuu yiri Prof. Gaandi oo sheegay in Dowladda lagu qasbay dagaalada.
Wasiirka Gaashaandhigga waxaa uu sheegay in Dib u heshiisiintii Djibouti kaddib ay Dowladda wada hadal iyo nabad ugu baaqday kooxaha ka soo horjeeda, wuxuuna sheegay in ay Kooxahaas nabad iyo wada hadal diideen, isla markaana ay isku dayeen in ay dowladda af-gembiyaan.
“Dowladda Soomaaliya waxay difaaceysaa dadkeeda iyo dalkeeda, waxayna la wareegi doontaa gacan-ku-heynta magaalada Muqdisho”ayuu yiri Prof. Gaandi oo sheegay in ay dowladda si tartartiib ah ay ula wareegi doonto gacan-ku-heynta magaalada Muqdisho, iyadoo buu yiri ku dadaali doonto in ay yareyso khasaaraha dadka shacabka soo gaaraya.
Waxaa uu ugu baaqay shacabka Soomaaliyed inay garab istaagto Ciidamada qaranka, isla markaana ay ku taageerto howlaha ay kula wareegeyso Magaalada Muqdisho, isagooonta tilmaamay inay ku dadaalayaan in ay shacabka dejiyaan oo aanay dhibaato u geysan inta dagaalka uu socdo sida uu hadalka u dhigay.
Shalay ayay aheyd markii Ra'iisul Wasaaraha Soomaaliya Cumar C/rashiid uu sheegay in Dowladda ay u diyaar garowday dagaal ay la gasho Mucaaradka, waxaana la ogeyn halka uu ku dambeyn doono dagaalada ay iclaamisay Dowladda KMG, xilli Kooxaha Mucaaradka ay ku sii siqayaan Gobolada kale, isla markaana hada gacanta ku haaya qeybo badan oo ka tirsan Magaalada Muqdisho.
Hooyga wararka Somaliyed
www.Jowhar.com
Jowharcom@hotmail.co m
Jowharcom@gmail.com