123 ku dhintay dagaalkii Wabxo
7 Jun 7, 2009 - 8:13:52 AM
Hay'ada Elman oo ka mid ah hay'adaha xuquuqda aadanaha ka shaqeeya ee saldhiga ku leh Muqdisho ayaa maanta oo Axad ah baahisay in dagaalkii guriceel ay ku dhinteen 123-qof oo u badan dhinacyadii dagaalamayay.
War qoraal ah oo ay hay'adan kasoo saartay Muqdisho ayay ku sheegeen in 120 ka mid ah dadka ku dhintay dagaalkii Wabxo ay ahaayeen maleeshiyooyinkii u dagaalamayay dhinacyada Islaamiyiinta ah.
Sidoo kale hay'adu waxay sheegtay in dhaawacyada dagaalka ka dhashay ay intaan ka badan yihiin, lana gaarsiiyay Isbitaalada Guriceel iyo Ceelbuur, balse warbixinteeda kuma faahfaahin in dagaalka ay saraakiil ku dhinteen iyo in kale.
Gudoomiye ku xigeenka hay'ada Cali Sh. Yaasiin [Fadhaa] ayaa warbixintan ku sheegay inay ka heleen hay'ado ka howlgala gobolada dhexe oo iyaga la shaqeeya, kuwaas oo uusan magacyadooda carabka ku dhufan.
Dhaqaatiirta Isbitaalada Istarliin ee degmada Guriceel iyo Isbitaalka Ceelbuur ayaa sheegay inay weli soo gaarayaan dhaawacyo isbitaaladaas, kuwaasoo ku dhaawacmay dagaaladii u dhexeeyay islaamiyiintii ku hardamay Wabxo.
Deegaanka Waxbo ayaa waxaa hada gacanta ku haya kooxda Al-shabaab oo kaashanaysa kooxda Xisbul Islam, waxaana jira dhaqdhaqaaqyo ciidan oo labada dhinac ay wadaan, kuwaasoo u muuqda inay dagaalo cusub dhexmari karaan.
Saraakiil u hadlay labada dhinac ayaa xaqiijiyay in dagaalkii ka dhacay Wabxo uu ahaa kii ugu khasaaraha badnaa ee ay abid galaan, waxaana dhinac walba uu gaarkiis u sheegtay inuu tiro badan ka dilay dhinaca kale.
Dagaalkii ka dhacay Guriceel ayaa noqonaya kii ugu khasaaraha badnaa ee maalin keilya ka dhaca deegaano ka tirsan Gobolada dhexe ee Somalia, waxaana dagaaladii horay u dhexmaray labadan dhinac ku dhintay dad fara badan.
GAROWE ONLINE
