Kulan ay dhawaan ku yeesheen magaalada London ee waddanka Britayn taariikhdu markay ahayd 13 June 2009 ayaa odayaasha, culimaa'udiinka, waxgaradka iyo aqoonyahanka labada beelood ee reer Sh.Abbayoonis iyo Abraahim waxay kaga wada hadleen colaadda iyo dagaalada isdaba joogga ah ee muddooyinkan danbe ka taagan deegaanka Doollo ee ay labada beelood wada dagan yihiin.
Colaaddaas oo dhalisay dagaallo isdaba joog ah oo keenay khasaare isugu jira dhimasho, dhaawac iyo barakac ku yimid labada dhinacba, ayaa waxgaradkii labada beelood ee shirkan isugu yimid ku tilmaameen inay tahay arrin aad u fool xun oo aan marnaba la qaadan Karin, daadinta dhiiga dadka sokeeyaha ah ee sabab la'aanta udaadanaya.
Sidaas daraadeed, Waxaa ay xubnaha labada beelood ee halkaa isugu yimid isla garteen:
In meel looga soo wada jeedsado daminta colaaddaas, loona joojin lahaa dhiigga sokeeya ee ka dhex daadanaya dadkaa walaalaha ah
In laga wada shaqayo nabadda iyo sidii dib loogu soo celin lahaa walaalnimadii, kalsoonidii iyo nabad ku wada noolaanshihii soo jireenka ahaa ee u dhaxeeyay labada beelood.
In la xoojiyo go’aamadii iyo waxqabadkii madaxdda deegaanka ee Soomaaliyeed ee arrinta labada beelood
In odayaasha, samajeclaha iyo waxgaradka labada beelood la garab istaago si ay u soo afjaraan shaqaaqadan naxdinta leh
In wadajir loo qabto gacmaha fidma wadayaasha labada reer si aanu dabku u sii hurin caqliguna u taliyo
Haddaba annagoo ku hadlayna magaca dhammaan dadka labada beelood ee ku dhaqan wadanka Britayn waxaan ugu baaqaynaa mas'uuliyiinta, waxgaradka, culimaa'udiinka, aqoonyahanka iyo dhammaan shacabka labada beelood meel walba oo ay joogaan in si degdeg ah oo waliba sharuud la’aan ah loo joojiyo colaadda iyo dagaalada halkaa ka socda, meelna looga soo wada jeedsado sidii nabad waarta loogu wada noolaan lahaa.
Waxaa u Saxiixey Baaqan labada dhinac:
Xukun Sheekh Xasan wacdi
Shaafi Cabdi Xuseen Aabi
Sh. Cabdifataax Sh. Muxumed
Maxamed Mahdi Xaaji Faarax
Axmed Ibraahim Caabbi
Cabdiwahaab Sanweeyne
Cabdinaasir Sheekh Biixi
Cabdirahman Sh. Aadan
Cabdullahi Suldaan Maxamed
Maxamed Macalim Axmed (Dhagacade)
Allaa Mahad Leh
Copyright © 2009 WardheerNews.com
