Sheekh Cumar Faaruuq “Alshabaab iyo Xisbul Islaam waxaa looga baahan yahay in ay u hogaansamaan Dowladda Islaamiga ah ee Xilligaan ka jirta dalka oo aysan dhibaato u geysan dadka, Diinta iyo dalka Soomaaliyeed..”
Mogadishu Thursday 11 February 2010 SMC
Sheekh Cumar Faaruuq oo ka mid ah Culumaa’udiinka Soomaaliyeed ee magaca ku leh dalka Soomaaliya iyo dibadiisa ayaa waraysi uu siiyay Idaacadda Radio Muqdisho ee taageerta Dowladda KMG ah ee Soomaaliya ayaa sheegay inuu ugu baaqayo kooxaha ka soo horjeeda Dowladda KMG ah in aysan Ummadda Khilaaf u horseedin oo ay u hogaansamaan Dowladda Soomaaliyeed ee hada jirta.
“Alshabaab iyo Xisbul Islaam waxaa looga baahan yahay in ay u hogaansamaan Dowladda Islaamiga ah ee Xilligaan ka jirta dalka oo aysan dhibaato u geysan dadka,
Diinta iyo dalka Soomaaliyeed” ayuu yiri Sheekh Cumar Faaruuq oo ku sugan dalka Sacuudiga.
Sheekh Cumar Faaruuq ayaa sheegay inay la gudboon tahay Dowladda Soomaaliya iyo Shacbigeeda inay dadka ku hogaamiso Diinta Islaamka, isagoo sidoo kale xusay in dadweynaha laga rabo in ay u raacaan Diinta iyo Dowladda, islamarkaasna ay ka fogaadaan Tafaraaruqa oo laga dhaxlaayo Guul daro.
“Midnimada waxay keenaysaa in la Guuleysto haddii si wanaag ah la isula Shaqeeyo, Dowladda Soomaaliya waxaan kula talinaayaa in ay ka shaqeyso Nabadda iyo Maslaxadda Ummadda, islamarkaasna ay badbaadiso Dhiigga Shacbiga Soomaaliyeed” ayuu yiri Sheekh Cumar Faaruuq.
Sheekh Cumar Faaruuq waxa uu ka hadlay waxa ay ka qabto Diinta Islaamka Riddeysiinta dadka Muslimiinta ah ay ku wadaan KOOXAHA ka soo horjeeda Dowladda wuxuuna sheegay in arrintaasi ay tahay Mid aan fududeyn, islamarkaasna ay tahay Kalmad ku dhaceysa Qofkii lagu sifeeyay ama Kii marka hore ay Afkiisa kasoo baxday.
Somaliweyn Media Center
.
