March 5, 2010
Xarakadda Al-Shabaab ee ka mid ah Mucaaradka ka dagaalama dalka Soomaaliya ayaa mamnuucday in la dhigo luuqadda Ingiriiska iyo maadooyinka Sayniska ah.
Maamulka Islaamiga ee degmadda Afmadow ee gobolka Jubadda Dhexe ee Xarakadda Al-Shabaab ayaa soo saaray wareegta u ku mamnuucayo in iskuuladda halkaas ku yaalo laga dhigo maadooyinka Sayniska iyo weliba luuqadda Ingiriiska,waxaana talaabadaas loo badinaaya ka dib marki dadka degan halkaas ay diideen amar hore ay soo jeediyeen oo ahaa in ay ku biiran dagaalka ay wado Xarakadda.
Dadka degaanka ayaa iyagu Saxaafada u sheegay in saddex ka mid ah iskuuladda halkaas ku yaala loo qabtay hal bil in manhajyada(Syllabus) loo bedelo Carabi iyo maadooyinka diiniga.
”Waxaa ayna weydiyeen in Ardayda ay kusoo biiraan Ciidankooda si ay u dagaalamaan,balse arintaas waan diidnay oo aan kasoo horjeesanay”,ayuu yiri mid ka mid ah Macalimiinta halkaas wax ka barta oo ka gaabsaday magaciisa.
Waxgaradka ayaa iyaguna sheegay in Ciidanka Xarakadda Al-Shabaab ay maalinimadi axadda ay albaabada isku dhufteen Iskuuladda ku yaala degmooyinka Waamo iyo Dhoobaale ayna ku amreen doonaan joojinta barashada Luuqadda Ingiriiska.
”Maamulka Islaamiga waxaa ay xireen goobaha waxbarashada,waxaana ay ku amreen in ay joojiyaan barashada luuqadda Ingiriiska oo ay sheegeen in ay tahay luuqadda ay iska leeyihin Reer Galbeedka”,ayuu yiri Cali Mowliid Maxamuud oo ka mid ah Waxgaradka degmadda Afmadow.
Waxaana uu sheegay in arintaas ay ku sababeen in mustaqbalka ardaydaas ay basaasin u noqon doonaan Reer galbeedka.
Iskuuladda ayaa dib loo furay maalinimadi talaadada ka dib marki Macaliminta iyo Waxgaradka ay ogolaadeen amarkaas.waxaana ay go’aankaas saamayn ku yeelatay 23-macalimin oo aan aqoon luqadda Carabiga oo ku khasabtay in ay ka tegaan shaqada.
Talaabadan iyo go’aankaan ayaa ilo Xog Ogaal sheegaayan in ay daba joogto hadal kasoo yeeray Dowladd Ingiriiska oo ku sabsan in ay Xarakadda Al-Shabaab ku darayso liiska Argagaxiisada Caalamka.
Horseed Media
