Duqeyntii ugu qasaaraha badneyd ee bilihaan oo lagu garaacay Bakaraha
Muqdisho: (Sh. M. Network) Waxaa sii kordhay qasaaraha ka dhashay duqeyn galabta lagu garaacay Suuqaq Bakaaraha iyo dagaalo goos goos ah oo maanta ka dhacay Xaafado ka mid ah magaalada Muqdisho.
Inta la ogyahay 15 ruux ayaa ku geeriyootay 80 kalana waa ay ku dhaawacmeen madaafiic iyo dagaalo goos goos ah oo saakay ilaa galabta magaalada Muqdisho ay isku weydaarsadeen ciidamada dowladda KMG Soomaaliya, AMISOM iyo kuwa Xarakada Al Shabaab.
Dagaalka goos gooska ah ayaa waxa uu ka dhacay xaafado ka mid ah degmooyinka Hodon iyo Howlwadaag ee gobolka Banaadir halkaasi oo mudooyinkii u dambeeyay ay isku horfadhiyeen dhinacyada maanta dagaalamay.
Madaafiic farabadan oo dagaaladaasi goos gooska ah bar bar socday ayaa waxa ay ku hoobteen Suuqa Bakaaraha ee Magaalada Muqdisho, waxaana qasaaraha ugu badan dadka dhaawacmay uu ka soo gaaray duqeyntaasi.
Madaafiicda meelaha ay ku dhaceen ayaa waxaa ka mid ah masjidka Abuu Hureyra ee Suuqa Bakaaraha waxaana madfac halkaasi ku dhacay ku dhaawacmay 15 ruux xili ay ku sugnaayeen qeybta weysada ee masjidkaasi, sidoo kale meelaha ay madaafiicdu ku dhaceen ayaa waxaa ka mid ah qeybta Daawada, qeybta Badarka, qeybta Sarifka iyo sarta Cali Dheere waxaana halkaasi ku dhaawacmay dad aad u farabadan.
Madfaca ku dhacay qeybta badarka ee Suuqa Bakaaraha ayaa waxa uu sidoo kale sababay gubashada dhowr bakhaar oo halkaasi ku yiilay, iyadoo dhinaca kalana dad rayid ah ay ku dhaawacmeen madfacaasi.
Cali Muuse Sheekh oo ah madaxa saraakiisha gaadiidka gurmadka deg dega ah oo Caawa Shabelle u waramayay ayaa sheegay in galabta ay qaadeen dhaawacyada 80 ruux oo rayid ah oo ku waxyeeloobay duqeynta lagu garaacay Suuqa Bakaaraha.
Sidoo kale Cali Muuse waxa uu sheegay in dhaawacyada ay wax ka qaadeen gaadiid si gaar ah loo leeyahay iyo kuwa ay lahaayeen xarakada Al Shabaab, isagoo intaasi ku daray in ay arkeen dhimashada in ka badan 10 qof oo rayid ah.
Xaaladda ayaa caawa waxa ay tahay mid aan deganeyn waxaana xiliyada qaar la maqlayaa dhawaqa rasaas iyo madaafiic teel teel ah oo ka dhaceysa goobaha ay isku horfadhiyaan ciidamada dowladda KMG, AMISOM iyo Xarakada Al Shabaab.
Majiro wax war ah oo ka soo baxay dhinacyada dagaalamay oo ku aadan dagaalkii iyo duqeyntii maanta ka dhacay magaalada Muqdisho, waxaana dagaalkii maanta uu ahaa kii ugu qasaaraha badnaa ee bilihaan ka dhaca magaalada Muqdisho.
Its strange that some people out of clannism do not protest against the govt lead by sh.dalxiis & farmaajo and the atrocities committed by salibiyiinta Amisom(If they were peacekeepers, how come they massacre at this large scale?Fear Allah!), yet these same ppl were against ina yeey, amxaar and amisom two years ago.
