Boosaaso: (Sh. M. Network) Meydadka askar ka tirsan Ciidamada Maamulka Puntland ayaa lagu arkay inta u dhaxaysa Magaalooyinka Carmo ee gobolka Bari.
Sida ay xaqiijiyeen dad goobjoogayaal ah, labo askari oo ka tirsan Ciidamada Maamulka Puntland ayaa maanta meydkooda lagu arkay inta u dhaxaysa Tuulooyinka Yalho iyo Kariin oo Magaalada Boosaaso kaga beegan dhinaca Koofureed, waxaana aan la’ogayn ilaa iyo iminka cidda sida tooska ah ugu dambeysay dilka askartaasi.
Darawalada ku safrta Wadada dheer ee xiriirisa Magaalooyinka Garoowe iyo Boosaaso ayaa waxaa ay shegeen in wadadaasi ay ku arkeen meydadka labo askari oo ka tirsanaa Ciidamada Maamulka Puntland kuwaasi oo sida la sheegay laga gooyay qoorta.
Goobjooge ku sugan goobta lasoo dhigay askarta ayaa waxaa uu isna Idaacadda Shabelle u xaqiijiyay in meydadkaasi ay ahaayeen kuwa qoorta laga gooyay, isagoo carabka ku dhuftay in dadka ku dhaqan Tuulada Yalho iyo Kariin ay aargagax ka muujiyeen arintaasi oo uu sheegay inay tahay mid ku cusub deegaankaasi.
Majiro wax war ah oo kasoo baxay Maamulka Putland oo ku aadan labadaasi meyd hase ahaatee warar hoose oo soo baxaya ayaa sheegaya in laba askari ee madax laga gooyay ay Maxaabiis ahaan u haysteen Ciidamada Sheekh Max’ed Saciid Attam oo dagaallo kala soo horjeeda Ciidamada Maamulka Puntland inkastoo aan si dhab ah loo xaqiijin Karin in dhacdadaasi ay ka dambeeyeen.
Tuulada Yalho oo dhinaca Koofureed Magaalada Boosaaso 50-KM kaga beegan ayaa waxaa ay aad ugu dhowdahay deegaanka Gal-gala oo inta badan ka dhaca dagaallo u dhaxeeya Ciidamada Puntland iyo kuwa Sheekh Max’ed Saciid Attam.
