Tartankii Quraan-Akhriska ee guud ahaan Gobollada Somaliland oo ka socday Masjidka Cali Mataan ee Magaalada Hargeisa, ayaa la soo gebogebeeyay, isla markaana abaal-marino kala duwan la guddoonsiiyay ciddii kaalmaha hore gashay.
Tartankan oo sanadle ah, isla markaana Ramadaan kasta lagu qabto Magaalada Hargeisa, waxa soo qaban-qaabiya Culimo reer Somaliland. Waxaana tartankan oo ahaa kii 19-aad ee qabsooma ka qayb-galay Wasiirka Diinta iyo Aw-qaafta Somaliland Sh. Khaliil Cabdillaahi Axmed, Sh. Maxmed Sh Cumar Dirir, Sh. Maxmed Aadan Muxumed, Sheekh Maxamed Cali Gadhle, Sheekh Cabdiraxmaan Axmed, Culimo tirro badan iyo kumanaan dadweyne ah. "Runtii, waxaan halkan sanadkii hore ka ballan-qaaday in aanu anagu ka-Wasaarad ahaan tartanka qabano, SUBXAANA LAAH, nooma ay suuroobin, arinkaasina riyo ayuun buu ahaa. Waxaan ILaAHAY ka rejaynayaa inuu ka dhabayn doono," sidaa waxa yidhi Wasiirka Diinta iyo Awqaafta oo ka hadlay gebogebadii tartanka.
Sheekh Ismaaciil Cabdi Hurre (Ismaciil Dheeg) oo ka mida Gudidda qaban-qaabada ee Tartankaasi oo halkaasi ka hadlay ayaa sheegay in tartankani ay soo qabanayeen ilaa 19 sanadood ee ugu dambeeyey, isaga oo soo maray marxadao kala duwan. Waxaanu sheekhu u mahad-celiyay Shirkadda Dahabshiil oo uu sheegay inay 13-kii sanno ee u dambeeyay maalgelisay tartanka Quraan-akhriska. "Ujeedooyinka ugu waaweyn ee aanu tartankan u qabano sanad walba waxa ugu muhiimsan dhawr qodob oo kala ah; sidii loo noolayn lahaa Quraanka Kariimka ah iyo sidii loo soo bandhigi lahaa sida ay dhalinyaradeenu Quraanka u baratay, una qaybtay, tan ugu mihiimsanina waxa weyeeye sidii loo soo saari lahaa Ducaaddii ama culimaddii barito anaga na badali lahayd," ayuu yidhi Sheekh Ismaaciil-Dheeg oo ka hadlayay ujeedooyinka tartanka.
Najiintada Aradayda iyo sida ay kaalmahaasi u kala galeen ayaa waxa ku dhawaaqay Sheekh Maxmed Aadan Muxumed oo ka mid ahaa Gudidda qabanqaabada tartankaasi uu sheegay inay aradayda shanadkan tartanka ka soo qayb galeen ay Ahaayeen 61 arday, iyada oo 32 ka mid ahi ay u tartamayeen 30 Jus ee Quraanka, halka 30 Ardayee kalena ay u tartamayeen 15 Jus oo ka mida Kitaabka Quraanka.
Ardayda kaalmaha hore ka gashay Xifdiga 30 Jus ee Qur'aanka:
Kaalinta 1-aad: Sharmaárke Saciid Nuur oo ka socday Gobolka Maroodi-jeex, waxa la Gudoonsiiyey Kitaab Quraan ah, Qalin Akhrinaya kitaabka, Hadyad, Shahaado iyo Lacag Dhan $700 oo Dollar.
Kaalinta 2-aad: Shucayb Ismaaciil Cabdi oo ka socday Gobolka Maroodijeex, waxa la Guddoonsiiyey Hadyado kala duwan iyo Lacag Dhan $500 oo Dollar.
Kaalinta Saddexaad: Axmed Maxmed Ducaale waxa la guddoonsiiyey Shahaado, Hadyad iyo Lacag Dhan $400oo Dollar.
Kaalinta Afaraad : Jaabir Sheekh Maxmed Cabdi oo ka socday Gobolka Sanaag waxa la gudoosiiyey Shahaado, Hadyad iyo Lacag Dhan $350 Dollar.
Kaalinta Shanaad: Cabdiraxmaan Cali oo ka socday Gobolka Awdal waxa la gudoonsiiyey Shahaado, Hadyad iyo Lacag Dhan $300 oo Dollar.
Ardayda kaalmaha hore ka gashay Xifdiga 15ka Jus ee Qur'aanka:
Kaalinta 1-aad: Mubaarig Khaliif Yuusuf oo ka socday Gobolka Maroodijeex waxa la gudoonsiiyey Sharaado, Hadyad, Kitaab uu Qalin akhrinayo iyo Lacag Dhan $350 oo Dollar.
Kaalinta 2-aad: Yaxye Axmed Xasan oo ka socday Gobolka Sanaag waxa la gudoonsiiyey Shahaado, Hadyad iyo Lacag Dhan $300 oo Dollar.
Kaalinta 3-aad: Axmed Maxamed Axmed oo ka socday Gobolka Saaxil, waxa la Guddoonsiiyey Shaado, Hadyad iyo Lacag Dhan $250 oo Dollar.
