Waxaa caawa si weyn u kacsan xaaladda magaaladda Baladweyne ee Gobolka Hiiraan, waxayna shacabka ku dhaqan magaaladda Baladweyne ay qabaan dareen xoogan, oo ku aadan in dagaalo culus ay ka qarxaan magaaladda.
Ciidamadda Dowladda Itoobiya ayaa waxay soo buux-dhaaf-sheen deegaanka Ceel-gaal oo masaafo yar u jira magaaladda Baladweyne, iyadoo ay caawa dhici kareyso in dagaalo culus ay ka qarxaan magaaladda Baladweyne.
Ciidamadda Dowladda Itoobiya oo aad u fara-badan, watana gawaarida gaashaaman ee Taanggiyada iyo madaafiicda goobta, ayaa waxay soo gaareen deegaanka Ceel-gaal ee duleedka magaaladda Baladweyne.
Qorshaha Ciidamadda Dowladda Itoobiya ayaa waxaa loo-fishay in dagaalo xoogan ay la-gallaan Ciidamadda Xarakada Al Shabaab, oo si weyn ugu sugan xaafadaha kala duwan ee magaaladda Baladweyne iyo duleedkeedaba.
Waxaa la-arkaayay Ciidamadda Dowladda Itoobiya oo isku sii fidinaaya buuraha balaaran ee ku yaalla duleedka magaaladda Baladweyne, waxayna xusul-duub ugu jiraan in Xarakada Al Shabaab ay magaaladda Baladweyne ka saaraan.
Marka laga soo taggo dhaq dhaqaaqyada balaaran ee ay sameynayaan Ciidamadda Dowladda Itoobiya, ayaa waxaa mid lamid ah sameyneysa Xarakada Al Shabaab, iyadoo daafacyo waaweyn ka gashay aafafka hore ee magaaladda Baladweyne, waxaana jirta in buuraha ku hareereysan magaaladda Baladweyne ay dagaal-yahanada Al Shabaab la-saaran yihiin hubka cul culus.
Xarakada Al Shabaab ayaa waxay ku goodisay inay iska caabin xoogan kala hortaggi doonto Ciidamadda Dowladda Itoobiya, haddii ay weeraro ku soo qaadaan Xaruunta Gobolka Hiiraan ee Baladweyne.
Tani ayaa waxay dhalisay in xaaladda magaaladda Baladweyne ay noqoto mid kacsan, waxayna shacabka qabaan dareen xoogan oo ku aadan, in dagaalo culus ay ka dhacaan Xaruunta Baladweyne iyo duleedkeedaba.
