Soomaali tiro badan oo laga sii daayay xabsiga dhexe ee caasimadda Libiya
Published: December 15, 2011
(Tripoli):-Muhaajiriin Soomaaliyeed oo ay tiradoodu gaarayso 168 dhallinyaro ah, kana kooban 114 rag ah iyo 54 dumar ah, ayaa shalay laga sii daayay Xabsiga weyn ee ku yaalla Magaalada Tripoli ee dalka Libya.
Muhaajiriintaan Soomaaliyeed, ayaa in muddo ah ku jiray Xabsigaas, ka-gadaal markii ay Ciidanka Nabad-sugidda ee dalkaas Libya ku soo eedeeyeen inay u guntanaayeen Tahriib xagga Badda ah, doonayeenna inay si sharci-darro ah Doonyo ugu gaaraan Xeebaha dalka Talyaaniga.
Sii-hayaha Safaaradda Soomaalida ee dalka Libya: M/D.Muxyaddiin M.Kaalmoy, ayaa si lixaad leh ugu guntaday, kana mira-dhaliyay sidii uu Mahaajiriintaan Soomaaliyeed uga sii dayn lahaa Xabsiyada Libya, ayna dib ugu heli lahaayeen Xorriyaddooda.
Muhaajiriintaan Soomaaliyeed ayaa iska fogeeyay waxa lagu eedaynayo, waxayna ku doodeen in ay damacsanaayeen in ay u sii gudbaan dalka Tuunis, si ay ugu biiraan Qaxootiyada kale ee ku sugan Xerada ‘Shousha’ ee ku taalla Xadka labada dal. Halkaas oo ay ku sugan yihiin Boqollaal Qaxooti Soomaaliyeed ah, oo iyagu markii hore ka bara-kacay dalka Libya.
Sii-hayaha Safaaradda Soomaalida ee Tripoli: Muxyaddiin M.Kaalmoy, ayaa ka codsaday Maamulayaal ka tirsan Xukuumadda KMG ah ee Libya,inay ka-caawiyaan walaalahooda Soomaaliyeed, sidii ay Sharciga degganaanshaha(Iqaamad) iyo shaqooyinba uga heli lahaayeen gudaha dalkaas. Codsigaas oo laga oggolaaday Madaxda Safaaradda.
Dhanka kale, Mudane/Kaalmoy wuxuu ku boorriyay Soomaalida Libya, inay ka waantoobaan falalka Tahriibka ah ee Tahlukada wata, ayna ka xoogsadaan Gudaha dalka Libya, iyagoo ka faa’iidaysanaya fursadda hadda taagan ee ah helitaanka sharciga iyo shaqadaba.
Boqollaal Soomaaliyeed oo kale, oo ka mid ahaa kuwii ku sugnaa Xerada(Sika-xadiidiya) ee bartamaha Tripoli oo ay maamulkoodu hayso Jamciyadda Xuquuqul-insaanka ee dalka Libya, ayaa iyaguna toddobaadkan Hawlo ka bilaabay Dawladda Hoose ee Tripoli. Jamciyaddan iyo Safaaradda Soomaalida ee Libya ayaa iyagu iska kaashada xal u helidda Arrimaha Muhaajiriinta Soomaaliyeed.
Xafiiska Warfaafinta ee Safaaradda Soomaalida
Tripoli-Libya
