Nimanyohow saqdii dhexe xalaan, salalay dhawr jeere
Qalbigaa isaaqmoo wadnahaa, sayray dhiig badane
Sarakacay sariirtii malladin, seexashiyo jiife
Caro saaqday laabtaa afkuna, aburka sayraaye
Si aan yeelo waan garan la’ahay, talo ansuubshaaye
Sanweyn qooqay baa igu tadhahay, suge dadkaygiiye
Safayn bay u laayeen dhammaan, magaca soomaale
Sunuud iyo naftoodaba ma dayn, saancadaaluhuye
Sawiradii an daawaday caray, igu siyaadsheene
Gumaysigu markuu saafay ee, seedihii jarayay
Saf yar oo caddaan ahi markay, soorka kala daashay
Hiilkaan siiyay waakuwii xornimo, saaray calankiiye
Santi laguma taartaa layiri, doqon sac weeyaane
Midkii aad wax siisaa udaran, dhagar samayntiiye
Sadar bay ku qoranyiin dadkay, naga sarquunsheene
Saamaxaad inaad qaadanaa, waa si aan jirine
Dagaalkii sokeeyaa ibaday, silica maantaahe
Sidaydii marbaan noqon adduun, waa sil-silad jaane
Sanweyntuna mar bay gelin dagaal, sabab la’aaneede
Duul soo yaacay way ii imaan, meerto socodkiiye
Kaydkay samaysteen ayaan, siin cantoobsiga e
Inkastoo siday ii galeen, anan samaynaynin
Haddana saadka qorigaan la dhici, saabka feeraha e
Mar haddaanan saam iyo gantaal, kugu ridayn saaka
Ama aanan diyaarado socdiyo, saaruuq kula gaarin
Sacabada waxaw dhiganayaa, saatir eebahaye
Sal hadhigina gaalada madow, malaha saaxiibe
Abaar soogan silic iyo wax li’i, seben colaadeedka
Sokeeyohoo dagaaliyo ilaah, nabadda kaa suuli
Saliidiyo batroolkiinu qarax, saatir waa keliye
Suujimo holcaysiyo cirkoo, danab ka soo yaaco
Dhul gariir saxriir idinku fala, dabaqyadoo seexda
Badda oo sunaamidi katimid, gobollo saamayso
Daacuun safmara oo ku dhaca, madaxdan siijeedda
Aydhiskii sibaabnaa rabbigay, ha idinku saynsaabo
Saqmi aan baxayn iyo xanuun, sababa ruuxiinna
Soo jire khalqigu wuxuusan maqal, saabay gurigaaga
So’ ha cunina xoolaha abaar, seexisaa heline
Sadkaad boobtay silic iyo ka qaad, saxasho mawdkaa ah
Boog iyo suntoo wada socdaa, saabka kaa daga e
Haddaad subag ku iidaamatiyo, sixin la geedeeyay
Saboolnimo daraadeed dunidu, qamadi kuu siiye
Senti dhururuq weligaa ha helin, faramarnaan seexo
Sebigiyo carruuraha u waa, soori waa qado e
Sabuulkiyo waxaad beerataan, sooma baxo waana
Roob soo darrooriyo ha helin, saban barwaaqaade
Biriq samada laga soo ganiyo, daadad kugu seexde
Calankaagu suulyoo lawaa, nacay surnaantiise
Afartaa summaday ee murtida, saaxi ma u sheegay
Xanaaqaan la sarakacay dagaal, seeri ma u yeershay
Ma ku sugay cadaawaha riddada, waan sumayn jiraye
Surmaseegto iyadoon lahayn, shiishka ma u saaray
Xog kalana anaa kuu sidee, saamac hadalkayga
Soomaali waa waaya arag, maanta say tahaye
Waddan aanay socodkii ku tagin, waa dhif saan qabo e
Sinji sooc huruufliyo dhibbay, qaabileen silice
Qaar diinta laga saaray oo, saaqidaa jira e
Kuwo dhaqanki sayroo dhar li’i, soogan baa badane
Sanka iyo dhegaha niman durtoo, dumarka saaweeya
Iyo sixille duul wada noqdoo, ay balwadi saaqday
Seygoodi dumar cayriyoo, saaxib la caweeya
Sarkhaansane warmoog iyo intii, siriqda loo qoolay
Waa tira ka saa’ida caqliga, sax u tilmaankiiye
Saxalkiyo dhibkaan nagu habsaday, sixir kasii weyne
Subxaanka iyo eebbaan baryee, sida hannoo dhaamo
Sawd afrika walaalaha ku nool, duco kusoo saada
Sugnaan iyo ammaan inay helaan, weyne u su’aala
Qalbigiinna siiyoo xanuun, ha idin saameeyo
Xaddiis sugan sidii uu ahaa, waad la socotaane
Xubin qura sidiisii ka dhigan, muumin sawraca e
Middii dhaawac soo gaaro waa, seexan kariwaaye
Innaguna sidaasaan nihiyo, kalama soocmaane
Midka dhagaxa lagu saafay waa, jiirka seedaha e
Saadkiyo hantidi kay dheceen, soori maan rabine
Inta haatan samabaxa qabtana, soo tagaan dhihiye
Waddankeennaa saatir noo dajaye, beerta saraciinna
Dhismihiisa sii horumarshoo, suga ammaankiisa
Warshadaha sancada keena oo, saaxi u adeega
Dalka sare u qaadoo ka dhiga, xarun lasoo aado
Dalxiisyada sun-sumi baa ku iman, marin socdaalkiiye
Dhaqaalahay sidaan baad la hari, doollar soo gala e
Kuwii shalay kusoo cayriyaa, daawan saanahaye
Saxada iyo muuqaalka wacan, yaabka way sidiye
Sawdkooda qaar baad ka maqal, saan umaan qabine
Nimcaduu sarreeyuhu dhex dhigay, saa’id naga dheere
Saliidda iyo macaadiinta taal, baarayaal suga e
Soddon ceel ka badan meelahay, sax u tilmaameene
Saddex keliya oon qodonabaa, sulus haraayaaye
Sawd afrikiyo asaageed ayaad , suulka ugu yeeri
Sidii aad dhahdaba way aqbali, saa danbaa tiriye
Sucuudigaa shidaal yari ku dhici, sida ay sheegeene
Salka moolka adigaa fadhiya, seermaweydada e
Sabool baahan soomaali maleh, sabanba waa cayne
Waqtigaa i saacidi rabbaa, siiya aadmiga e
Reer galbeedna saalufbaa ku dhici, salal abaareede
Sancadiyo farsamadaan hantiyi, sahasho waa maale
Saynis yahanno caanaa u kici, qalab sameeyaale
Sayruuq gacmeed baan hawada, saaran oo dhigane
Sirta iyo xogtoodaan ka heli, samada guudkaase
Gantaalaha riddada sii foglaa, saanacay barane
Diyaarado an soo saaray baa, suuqyadii tagiye
Tignoolooji sare iyo farsamo, gaalo sixi weyday
Sacabbaday afkii saarinoo, yaabka lala suurye
Marbaan dunida ugu xoog sarrayn, saan rajaysnahaye
Sixirkii qabiilkana fahmoo, laygu siri waaye
Rag inaan la saayiro ayaan, suumankow xirane
Saadaal rumowdana ma yara, saad la socotaane
Samir quusa weligaa ha filan, saa sawaan nahaye
Iinsha alla safarkiyo higsigu, waa sidaan rabaye
Iska sugo berriyo saadambaba, guusha soo socota
Aar yaa gabaygaan tirshey? Allow ku dhowr, ..How come I didn't visit Somalinet for so many hours? I should have seen this great poem as soon as it was posted...
