KISMAAYO: Odayaasha Beesha Hartiga oo qaadacay Maamulka uu Kismaayo kaga dhawaaqay Barre Hiiraale
Posted to the Web Jan 07, 22:58
Kismaayo:(pp) - Odayaasha , waxgaradka , iyo culamada Beesha Hartiga ee Kismaayo ayaa si buuxda u qaadacay maamulkii uu Barre Hiiraale uu kaga dhawaaqay magaalada Kismaayo, iyagoo ku tilmaamay maamulkii dooxada Jubba oo soo laabtay.
Magaalada Kismaayo ayaa asbuucyadii la soo dhaafay waxay gacanteedu gashay Ciidamada Dowlada Federaalka Soomaaliya, halkaas oo ay dowlada federaalku iyo ciidamada taageeraya dowlada Itoobiya ay weli dagaal dhanka xadka ah ay kula jiraan golihii maxaakiimta ee bur-buray.
Barre Aadan Shire ( Hiiraale) oo isagu horay u ahaa xogaamiyihii dooxada Jubba gashanaana shaarka wasiirka gaashaandhiga Soomaaliya ayaa maleeshiyada maxaakiimtu oo uu hogaaminayey Xasan Turki ay qasab uga saareen magaalada Kismaayo mudo laga joogo 2 bilood ka hor , kaddib markii ay magaalada Kismaayo 1998-dii ay gacan ku haynteeda ay la wareegeen Maleeshiyada Gal-gaduud oo waqtigaa la baxay dooxada Jubba.
Kasaaridii maxaakiimtu ay ka saareen Barre hiiraale iyo xulafadiisii , waxay dadka reer kismaayo u soo celisay noloshii hoose, dadkuna waxay dareemeen nabadgelyo taam ah , dad badan oo reer waamo ah oo guryahooda xoog looga qaadayna , waxay xaq u heleen inay guryahooda kusoo nabad noqdaan, guryahaas oo horay si xooga ay ugala wareegeen maleeshiyada dooxada jubba ee uu Barre hurboodi jiray.
Soo gelidii magaalada kismaayo uu Barre Hiiraale soo galay dadka reer waamo waxay u arkayeen shaydaan magaalada Soogalay, wuxuuna xaga magaca kala sinaa qab-qablayaasha kale ee soomaaliyeed , waxaase isaga gaar u ahayd ka safaynta iyo boobka oo si gaara ugu hayey Beesha Hartiga oo uu aaminsanaa inuu ka safayn karo magaalada Kismaayo, taas oo ah riyo uu habeenkii ku riyoon jiray.
Barre Hiiraale oo waqtigan u muuqda nin soo rogaal celiyey , maalmahana ku jiray maleeshiyo arruursi ayaa maanta waxa uu kaga dhawaaqay magaalada Kismaayo wax uu ugu yeeray gudi amaan oo sii wada kana shaqeeya magaalada Kismaayo. ku dhawaaqida guddigaas ayaa waxaa durba si xoog leh uga soo horjeestay Oday dhaqameedka beesha Hartiga iyo siyaasiyiin horay uga ahaan jiray madax magaalada Kismaayo.
Shir deg-dega oo ay galabta ku yeesheen magaalada Kismaayo, kaas oo ahaa mid hordhac ah ayaa waxay si buuxda isula qaateen kuna tilmaameen maamulka uu Barre Hiiraale sameeyey inuu la mid yahay maamulkii dooxada jubba oo dib ugu soo laabtay magaalada Kismaayo,ayna tahay arrin baadila.
Waxayna odayaashu ay sheegeen inay arrinkaas cabashadeeda iyo maamulka uu sameeyey Barre ay ku tilmaameen inuu yahay mid ka soo horjeeda axdi qarameedka Soomaaliya, ayna weli dareemayaan inaysan ka xoroobin dhibaatadii uu hore Barre hiiraale oo ku haayey dadka ka soo jeeda jubooyinka.
" Waan arkaynay oo waan dareenay in maleeshiyo Barre Hiiraale uu wato ay noogu yimaadeen guryihii ay horay nooga qaateen oo maxaakiimtu nooga soo celiyeen , waxayna hada nagu bilaabeen handadaad ah inaan guryaha markale ka baxno, taasna maanta kama yeelayno waana ku dhimanaynaa , oo baqdin weyn ma qabno oo wadanka dowlad baa joogta , waxaase sheegayaa inay weli ku jirto Barre Hiiraale iyo maleeshiyadiisa hankii dooxada jubba". ayuu yiri Sheekh Maxamed oo ahaa odayaashii shirkaas ka qayb-galay.
Sikastaba , odayaasha iyo waxgaradka Beesha Hartiga ee magaalada Kismaayo ayaa hada waxay sheegeen inay cabashadooda ay ugudbiyeen madaxda dowlada iyo baarlamaankaba , si ay ugu qeexaan waxa ka jira kismaayo ee uu ka wado Barre Hiiraale.Waxayna odaydhaqameedku shirkoodu uu ka bilowday galabta magaalada Kismaayo, soona gabo-gaboobayo maalinta beriya , sida Puntlandpost uu u sheegay mid kamida ka qaybgalayaasha Shirka.
Maxamed Jaamac
Puntlandpost, Kismaayo, Soomaaliya
