Mogadishu 29, March.07 ( Sh.M.Network) Dagaalo Qaraar oo saakay waabarigii ka bilowday caasimadda Somalia ee Muqdisho ayaa ilaa iyo haatan soconaya, iyadoo dagaalkaasi uu u dhaxeeyo ciidamada Ethiopia iyo kooxo ka soo horjeeda uu galaaftay nolosha dad ka badan 10 ruux halka tiro ka badan 50 kalena ay ku dhaawacmeen.
Dagaalkaan oo ay ka qeyb qaadanayaan diyaaradaha qumaatiga u kaca ee dowladda Ethiopia ayaa wali ka soconaya wadada warshadaha iyo nawaaxiga Towfiiq.
Daryanka madaafiicda iyo sawaxanka hubka culus ee la isku adeegsanayo ayaa hareeyay caasimadda Somalia, iyadoo ay joogsadeen isku socodkii gaadiidka iyo waliba howlihii ganacsi ee ka jirey caasimadda.
in ka badan 50 ruux oo dhaawac ah ayaa la dhigay Isbitalka Madiina ee magaalada Muqdisho, iyadoo ay jiraan dhaawacyo kale oo wali ku jira xaafadaha, waxaana adag sidii loo geyn lahaa Isbitaalada ka dib markii wadooyinka magaalada Muqdisho ay go'een.
Dirir xoogan oo ka soconeysa Xaafadda Towfiiq ee magaalada Muqdisho ayaa la isku adeegsanayaa hubka nuucyadiisa kala duwan, iyadoo halkaasi ay ku geeriyoodeen ilaa 5 ruux halka 8 kalena ay ku dhaawacmeen, kuwaasi oo u badan dad rayid ah oo madaafiic ay ku soo dhacday.
Ciidamadii Ethiopianka ee ka dagaalamayay Isgoyska Towfiiq ayaa dib loo soo riixay, iyagoo haatan ka dagaalamaya wadada Miisaanka dhuxusha iyo Baar Ayaan., inkastoo wali ay soconeyso madaafiic iyo israasaaseyn xoogan.
Wariye ka tirsan shabelle oo gaaray xaafadda Towfiiq ayaa dad goobjoogayaal ah waxa ay u sheegeen in ciidamada Ethiopia gaari taanki ah ay wateen halkaasi silis lagaga gooyay, iyadoo gaari kale oo Ural ahna laga gubay.
Ma jiro wali wax warar ah oo ku saabsan qasaaraha gaaray dhinaca kale ee ka soo horjeeda ciidamada Ethiopia.
Sidoo kale waxaa jira madaafiic BM ah oo laga tuuray dhinaca Madaxtooyada oo ku dhacayay xaafadaha Towfiiq, inkastoo aan la soo sheegin wax qasaaro ah.
Dagaalka waa uu soconayaa waana mid marba marka ka dambeysa sii xoogeysanaya.
Wixii ku soo kordha kala soco shabelle.net
