Golaha dib u heshiisiinta iyo danaha beelaha Abgaal oo Qoraal ka soo saaray dagaalada Muqdisho
Last Updated::2007-03-30 18:10:36
Muqdisho:- Sida la ogsoon yahay dowladii dhexe ee Soomaaliya waxay burburtay 16-sano kadib,
laga soo bilaabo xilligaasna Soomaaliya waxaa soo food saaray dhibaatooyin ba'an oo isugu jira kuwa dabiici ah iyo kuwo bani'aadamku ku lug leeyahay, dad badan ayaa ku naf waayay, kuwa kalena way ku naafoobeen.
Dadaalo badan oo ay ka qeyb qaateen ururo goboleedyo iyo kuwa caalami ah ayaa la sameeyay si xal loogu helo arrimaha Soomaaliya. inkastoo dhammaan dadaaladaasi ay ku dhammaadeen guul darri hadana mar walba waxaa laga qaadanayay waayo aragnimo iyo khibrado.
Taa ayaa suurtagelisay in dabayaaqadii sanadkii 2004-kii ay Soomaalidu dhisato Dowlad Federaal ah, iyadoo lagu saleeyay qaab beeleed ku dhisan xeerka loo bixiyay 4.5, waxaana xusid mudan dowrka weyn oo ay ka ciyaartay IGAD hergelinta dadaalka loogu jiray in Soomaaliya dowlad loo dhiso.
Hase ahaatee waxaa dowladdii soo foodsaaray culeys weyn, taa oo in muddo ahba u suurtagelin weysay inay xasilooni iyo kala dambeyn dalka ku soo dabaasho. Arrintani way sii cakirantay tan iyo markii uu soo ifbaxay ururkii Golaha Maxaakiimta, oo iyagu gacanta ku dhigay gobolada Koonfureed intooda badan, waana lagu guul darreystay in si nabad ah lagu xalliyo khilaafka siyaasadeed ee u dhaxeeyay iyaga iyo DFKMG ah, markii dambena Dowladda Federaalka oo kaashaneysa Dowladda Itoobiya waxay arrintaan ku soo afjartay awood, taa oo u suurta gelisay inay dowladdu gaarto caasimada Soomaaliya ee Muqdisho.
Dowladda iyo caalamka gaar ahaan dowladaha daneeya arrimaha Soomaaliya intuba waxay xoogga saareen in marxaladaan loo baahan yahay dib u heshiisiin dhex marta Soomaalida, sidaa darteed dowladdu waxay ku baaqday shir dib u heshiisiin, waxaase arrintaan iyo gebi ahaanba ajandaha nabadeynta caasimada ka hor yimid dad iyagu isku magacaabay beesha Hawiye.
Khilaafkaan iyo maandhaafkaan wuxuu sababay dagaalo ba'an oo ka dhacay caasimada geystayna khasaaro naf iyo noolba leh iyo walibabarakac weyn.
Beesha Abgaal, kadib markii ay u kuur gashay arrimahaan oo dhan, waxaa lama huraan noqotay inay muujiso mowqifkeeda ku beegan arrintan soona saarto war-murtiyeedkaan:-
1- Beesha Abgaal, oo ka mida beel weynta Hawiye, ahna mid ka mid ah kuwa ugu waaweyn qeybaha beesha Hawiye, waxay caddeyneysaa inaysan ku lug lahayn shirarka ay qabanayaan dad iyagu isku magacaabay inay ku hadlayaan magaca beesha Hawiye, iyo dagaalada ka socda magaalada toona.
2- Beeshu hadda wixii ka horeeyay waxay u kuur galeysay xaaladda, waxayna baadigoob ugu jirtay qaabkii si nabad ah xal loogu heli lahaa arrimaha Soomaaliya, waxayna beeshu si weyn uga qeyb qaadaneysaa sidii loo soo celin lahaa Qaranimadii Soomaaliya.
3- Beeshu waxay si buuxda u taageersan tahay Dowladda Federaalka, iyadoo aaminsan in Dowladnimadu tahay wadada kaliya ee looga bixi karo dhibka ay ummadda Soomaaliyeed ku jirto.
4- Beeshu waxay sidoo kale ugu yeereysaa qeybaha kale inay ku soo biiraan geedi socodka nabadeed, kana fogaadaan wax walba oo abuuri kara khalalaaso cusub.
5- Ugu dambeyn waxaan codsaneynaa bulsha weynta caalamka iyo tan gobolkaba inay ku caawiyaan dadka Soomaaliyeed sidii loogu dabaali lahaa nabad iyo kala dambeyn dalkooda.
Waxaan xusuusineynaa dhammaan qeybaha kala duwan ee Soomaalida:-
1- In Dowladdani tahay Dowlad Federaal ah, kuna saleysan 4.5.
2- In loo baahan yahay qabashada shirka dib u heshiisiineed si loogu soo celiyo umadda dhexdeeda kalsooni.
3- In la ilaaliyo dastuurka Federaalka iyo dhammaan heshiisyada xiriirineed ee u dhaxeeya umadaha caalamka.
Wabillaahi Towfiiq
Qoraalka ka soo baxay Golaha dib u heshiisiinta iyo danaha Abgaal waxaa ku saxiixnaa Afhayeenka Golahaasi Md. Muxyaddiin Xasan Afrax.
Maxamuud Axmed Xasan (Xuurshe)
xuurshe114@hotmail.com
Somaliweyn | HRNet
