Waxaa si xowli ah uga socda diyaargarow dagaal iyo abaabul xoogan magaalada Muqdisho, xili la dareemay degenaasho gaaban oo aan caga badan ku taagneyn, iyadoo goor walba la filan karo, guluf colaadeed oo Muqdisho ka dhaca ayna madaxa is daraan Xoogaga Kacdoonka, iyo Ciidamada Ethiopia oo iyaguina soo gaareen gurmad Ciidan iyo hub kadib markii aad loo wiiqay awoodii Ciidan ee magaalada ku sugeneyd dagaalka 3-da maalmood socday….
Xiisadaan colaadeed ayaa la sheegay iney sare u sii qaaday kadib markii warar xasaasiyad xambaarsan uu jeediyay dhowaan Col.C/laahi Yuusuf lagana dareemay dhamaan degaanada beelaha Hawiye oo ay ku jirto Caasimada Muqdisho,waxeyna kor u kicisay shucuurta iyo qiirada shacbiga, kadib markii la faafiyay wararkaasi oo uu ku sheegay in Beelaha Hawiye 90% kiiba ka soo horjeedaan dowladiisa sidaas daraadeedna ay kala adkaan doonaan uuna dhici doono dagaal ka baaxad weyn kii 1992-dii, Col.Cabdilahi Yusuf oo ah Madaxweyne aan shacab lahayn, kuna adeegta Ciidamada Ethiopia isla markaasna ku shaqeeya siyaasad qalafsan oo qabyaalada ku dhisan, ayaa waxaa warar dahsoon ay sheegayaan inuu hadalkaas ahaa mid looga qabtay talefonka Mobile-ka ,xili uu la dardaarmayay xubno ka soo jeeda Puntland oo uu kaga warbixinayay Maleeshiyaadkii lagu jiiday wadooyinka Muqdisho, dhanka kale Kooxaha Kacdoonka Muqdisho ayaa wada isku diyaarinta dagaal ay la galaan Ciidamada Ethiopia, waxeyna wadooyinka qaarkood dhigeen caro kaawooyin iyo iney ku beeraan miino si gaadiidka iyo Ciidamada Ethiopia ay si fudud uga howl gelin waxeyna sidoo kale dhigeen Kooxo aad u hubeysan wadooyinkaasi, isla markasna waxey sii xoojiyeen dhamaan aaga la isku hor fadhiyo, dad badan ayaa saadaalinaaya in Dowlada Ethiopia aysan daacad ka aheyn ee ay dooneyso iney wakhtiga dheereysato si ay dib isugu abaabusho ciidamadeeda ku sugan caasimada oo burbur ka soo gaaray dagaalka, waxaana la filan karaa wakhti walba inuu dhaco dagaalka.
