Burco: Maxaa Kala Haysata Dumarka Gawaadhida Wata Iyo Ragga Bilaa Camalka Ah?
Burco(Ramaas) June02, 2009 - Haweenka Darawaliinta ah ee wata gaadiidka yar-yar ee ku nool magaalada Burco ee xarunta gobolka Togdheer ayaa dhibaatooyin kala duwan kala kulma markay suuqyada marayaan gaar ahaan meelaha mashquulka ah ee ay dadka iyo gaadiidku ku badan yihiin.
Dhibaatooyinkan oo ay had iyo goor dumarkani ka cawdaan ayaa isugu jira Aflagaadooyin, Cago joglayn iyo Ciidayn ay mararka qaar la kulmaan, arintaasina waxay mararka qaar ku kaliftaa dumarka gawaadhida wata kuwooda caloosha Jilicsani in ay sal-babakhaan oo gaadhiga ay wataan uu la jiidho meheradaha ama gawaadhida kale oo ay dhibaato soo gaadho.
Arinta noocan ah ee ay dumarku ka cawdaan oo Ramaasnews wax ka waydiisay qaar ka mid ah Haweenka Darawaliinta ah ayaa Arinaasi ku eedeeyay badanaaba in ay kala kulmaan ragga oo ay ku qayliyaan marka ay arkaan iyagoo gawaadhi wata dumarku, isla markaana dumarkan ramaasnews u waramay ayaa dumarka gawaadhida wata uga digay in ay arimahan ka feejignaadaan oo mararkay la kulmaan aanay salbabakhin ee ay calool adayg muujiyaan si aanay dhibaatooyin u gaysan.
Caasha Cali Qabile oo ka mid ah dumarka ku nool ee magaalada Burco gaadiidka Yar-yar ku wata oo arimaha ay wadista gawaadhida dumarku kala kulmaan ka warbixinaysa ayaa tidhi ”Had iyo goor markaanu marayno meelaha dadku ku badan yahay ee mashquulka ah, waxaanu kala kulanaa dhibaatooyin kala gadisan oo isugu jira cay, qaylo iyo ciidayn ay badanaaba nagu sameeyaan ragga qaar ka mid ahi, kuwaas oo mararka qaar ay ku kalifaan dumarka marka lagu qayliyo in ay naxaan oo ay gawaadhida ay wataan uu lagalo gawaadhida kale ama uu lagalo meheradaha ama ay dad jiidhsiiyaan “.
Mararka qaar ayaa xitaa ragga gawaadhida wata ayaa nagu hor jara gawaadhidooda, isla markaana marka laysku soo wada duubo way badan yihiin dumarku dhibaatooyinka ay kala kulmaan gawaadhi wadista, arintaasina dadka ku kacaa waa dadka Jaahiliinta ah ee aan garanayn xaq dhawrka iyo sharciga ummaddu isku leedahay.
Sidaas darteed, anigu imika gaadhigayga waxaan watay muddo ku dhaw saddex sano, wax dhibana maan gaysan ee intaasba ilaahay ayaa iga badbaadiyay, laakiin way jiraan dumar badan oo marka lagu qayliyo ama la ciideeyo gawaadhida ay wataan ay dhibaatooyin gaystaan “ Markaa waxaan kula talinyaa dumarka gawaadhida wata iyo kuwa baranayaba in ay calool adayg yeeshaan oo ay iska ilaaliyaan naxdinta markay gawaadhida wataan”.
Saynab Axmed Nuur oo iyana ka mid ah dumarkan gawaadhida wata ayaa tidhi anigu markii hore debeda ayaan gawaadhida ku wadan jiray oo wax dumarka caayaya iyo wax shiidaya toona maanu arag, laakiin markii aan imi Burco iyo Hargaysaba waxaan ku arkay waxyaabo aad la yaabaysid oo kugu kalifaaya in gaadhi kaxayntiisaba ay iska daayaan dumarku”. Waxaad arkaysaa rag waaweyn oo gadh leh oo markay arkaan dumar gawaadhi wata aflagaadaynaya oo aan xishoonayn.
Markaa waxyaabaha aanu kala kulano wadista gawaadhida lama soo koobi karo ee dulqaad ayaanu wax ku wadnaa.
Ugu dambayntii magaalada Burco ayaa waxa marba marka ka dambaysa ku soo badanaya dumarka gawaadhida yar-yar wata ee ku fushanaaya adeegyadooda shaqo, kuwaas oo u shaqeeya dawlada iyo hay'addaha wadaniga ah iyo ururada gaarka ah sida LNGO-yada.
Ramaasnews Desk
Burco
