Guddomiyaha Xisbiga Mucaadka Ah Ee UCID Oo Ka Hadlay Sannad-guurada 1-aad ee Ka Soo Wareegtay Qaraxyadii Foosha Xumaa ee Hargaysa Lala Beegsaday 29/10/08
Hargaysa (Oodweynenews)- Gudoomiyaha xisbiga mucaaradka ah ee UCId Eng. Faysal Cali Waraabe, ayaa shaaca ku baaqay in maalinta berito ah ee bisha Obtober tahay 29 in la sameeyo munaasibad weyn oo lagu xusayo sannad-guuradii koobaad ee ka soo wareegtay qaraxyadii argagixiso ee 29-kii bishii October 2008-dii lala beegsaday Madaxtooyada, safaaradii Itoobiya iyo xafiiskii Hay’ada UNDP ee magaalada Hargaysa.
Gudoomiyuhu waxa uu sidan ka sheegay xafladii dhaaritanka ee maanta loo qabtay xubnaha Komishanka, waxaa kaloo uu sheegay in la muujiyo dareen murugo iyo ka xumaansho ah oo lagaga turjimayo dhacdadaas argagaxisada ahayd ee lagu qaaday xarumaha muuhiimka aha ee Hargaysa ee muwaadiniinta faraha badan ee reer Somaliland ku nafwaayeen.
“Berito waa 29-kii October, waa maalintii weerarka axgigixisada ah la’inagu soo qaaday. Waxaan jeclahay dawlad iyo shicib-ba maalintaa inaynu xaflad-weyn qabanaa, oo aynu tusnaaa [kuwii qaraxa gaystay] inaynu ka xun-nahay iyo inaynu dadkeenii xasuunanayno....dadkeenii sida xaq-darrada ah u dhintay.” Ayuu yidhi Eng. Faysal Cali Waraabe,
Waxaana uu intaa raaciyey oo uu yidhi “Mar haddii ay inoo soo hanjabayaan-na, waa inaynu u sheegnaa haddii aanu Somaliland nahay inaan muranka dhaxdayadu ahayn inaanu kala jeedno, laakiin aynu meel ka soo wad-jeedno, diyaar-na u nahay meel-qudha oo dalka ak mid ah haddii ay xabadi ka dhacdo inaanu u soo wada-baxayno oo aanu isku maqiiqayno.”
Waxaana uu Gudoomiyuhu soo jeediyey in lala yimaado taxadir dheeraad ah, si meel looga soo wada-jeedo wixii waddanka wax u dhimaya, isla markaana tallaabo adag looga qaado cid kasta oo isku dayaysa inay mashaqo iyo dhibaato ka gaysato waddanka.
C/shakuur Xaaji Muxumed Muuse [C/heersare]
Oodweynenews.com/ Hargaysa/Somaliland
Cabdiheersare01@hotmail.com/heersare2009@gmail.com
http://www.oodweynenews.com/display_pag ... leid=11730
