Hargeysa (Oodweynenews) – Guddoomiyaha Maxkamada sare ee Somaliland Md Maxamed Xirsi Oomane ayaa maanta magaalada Hargeysa ku dhaariyey 71 xubnood oo Komiishanka doorashooyinka qaranka Somaliland u xushay inay ka hawl-galaan goobaha doorashada ee saddexda Gobol ee Maroodi-jeex, Awdal iyo Saaxil.
Xubnahan loo dhaariyey hawlaha la xidhiidha cod-bixinta doorashada aqalka Madaxtooyada Somaliland oo u badan aqoonyahan dhalinyaro ah ayaa maalmaha soo socda waxa la siin doonaa tababar la xidhiidha hawsha ay bulshada u qabanayaan.
Guddoomiyaha Komiishanka doorashooyinka Qaranka Md Ciise Xamari oo ka hadlay Munaasibadii dhaarinta xubnahan loo diyaarinayo inay ka hawl-galaan doorashada Somaliland oo ka dhacday Huteelka Ambasador ee Magaalada Hargeysa, ayaa waxa uu kula dardaarmay inay ku dadaalaan sidii ay umadooda ugu shaqayn lahaayeen si daacadnimo ku jirto, si loo helo doorasho xor iyo xalaal ah oo ay ku wada qancaan dhinacayada ku tartamaya kursiga madaxtooyada Somaliland.
Munaasibadda dhaarinta xubnahan hor-dhaca u ah shaqaalaha doorashada madaxtooyada ee Komiishanku qaadanayo ayaa iyaguna waxa goob joog ka ahaa xubne sare sare oo ka tirsan saddexda xisbi Qaran ee Somaliland, kuwaas oo ujeedada ay u tageen xaflada ay ahayd inay dhiirigaliyaan shaqaalaha loo tababarayo doorashada.
Md Aaden Maxamed Mire Waqaf oo ka socday xisbiga Mucaaradka ah ee UCID, Kayse Xasan Cigge oo ka tirsan xisbiga KULMIYE iyo Cumar Jaamac Faarax oo isna ka socday xisbiga UDUB ayaa dhammaantood halkaasi kalmado koob-kooban ka jeediyay iyagga oo ka taxadaraya hadalo dhaliya muran siyaasi ah, ayaa waxa ay dhammaantood muujiyeen sida ay ugu faraxsan yihiin dhalinyarada loo dhaariyey hawlaha la xidhiidha doorashada, iyagga oo si toos ugu sheegay qolooyinka la dhaariyey in iyaga gacanta loo galiyey mustaqbalka Somaliland iyo in dalka doorasho wanaagsani ka dhacdo.
Xubnahan la dhaariyey oo hor-dhac u ah shaqaale faro badan oo ka hawl-gali doono doorashada aqalka madaxtooyada Somaliland oo dhawaan la filayo ayaa waxa ay rajo wanaagsan galinayaan dhammaan shacabka Somaliland, gaar ahaan dadka u diyaarka ah in isbadal dalka ka dhaco.
Oodweynenews.com Desk
Hargeysa/Somaliland
