Postby Siciid85 » Mon Apr 05, 2010 5:53 pm
Here it is Faisal Ali waraabe pointing out the wrongs of both sides and saying it like how it is.
“Wasiirada dhallinyarada reer ahaan ula shirayna waxaanu leenahay sidee ayay shacabku idinku aaminayaan haddii aad beeshiinii si gaar ah ula shirteen, mana tihidin wasiiro qaran ee waxaad tihiin wasiiro qabiil.”
Hargeysa/Sallaxleynews-Guddoomiyaha xisbiga Mucaaradka ah ee UCID Md. Faysal Cali Waraabe, ayaa ka hadlay shir uu xisbiga KULMIYE u qabtay toddobaadkan dhallinyaro ka soo jeeda Beelaha Galbeedka Burco, Oodweyne iyo Bariga Hargeysa, oo sheegay inay cudodoodii ku wareejiyeen xisbiga KULMIYE.
Guddoomiyaha xisbia UCID Md. Faysal Cali Waraabe, oo xalay u waramay Wargeyska , ayaa sidoo kale ka hadlay isku daygii fashilmay ee ay xukuumadda Somaliland damacday inay ku hor joogsato taageerayaashaas ku biiray KULMIYE.
Md. Faysal, oo ugu horayn ka hadlaya, shirkii uu KULMIYE u qabtay dhallinyarada Jaamacadaha ee beelahaas Habaryoonis, waxa uu yidhi “Waxani maaha wax lagu kaambayn gareeyo, waa la igu soo biiray iyo waa la I soo galay maaha wax macno leh, qofku haddii uu xisbi ku soo biiro waa inuu xubinimadii bixiyaa oo uu is diiwaangeliyaa, laakiin dad inta la iska soo ururiyo la yidhaahdo way nagu soo biireen, waa dhaqan halkan yaala laakiin aan adduunka laga aqoon.”
Faysal, waxa uu xisbiyada mucaaradka u soo jeediyay inaanay dhiirigelin arrimo uu ku tilmaamay kuwo aan qurux badnayn oo uu sheegay inay ka mid yihiin waxyaabaha ay ku dhaqanto xukuumadda Madaxweyne Rayaale, “Waxa aad u fool xun inagoo qabyaalad la dagaalamayna in dadka jaamacadaha qabyaalad la geliyo oo dhallinyaradii jaamacadaha ku jirtay waxyaabahaas lagu beero. Waxyaabihii xumaa ee ay xukuumadda iyo UDUB waday maaha in mucaaradkuna bilaabo, waa tii aanu dawladda ku cambaaraynaynay markaas in xisbiyada mucaaradku ku daydaan wixii ay dawladu waday, oo qabyaaladda kobciyaan. Waxaanu qabnaa in ardayda jaamacaduhu isku mid yihiin beel kasta ha ahaadeene oo ay u baahanyihiin arrimo ay ka mid tahay tacliinta oo bilaash looga dhigo. Maaha in siyaasiyiintu soo qabtaan ardayda beelaha oo ay kala soocaan, laakiin waa inuu xisbi kastaaba ka iibiyaa barmaamijkiisa dhallinyarada oo wuxuu ugu tallo galay keenaa.”
Faysal, waxa uu ka hadlay tallaabadii ay xukuumadu isku dayday inay ku hor istaagto shirkaas, oo uu ku tilmaamay mid sharci darro ah, “Dawladuna xaq uma laha inay iyaduna meel kasta ka ololayso oo ay lacagtii ku ololayso oo ay khayriyadda ku ololayso asxaabtana u diido oo ay weliba si ficil ah oo keeni kara iska horimaad arrimahan ugu kacdo. Dadka arrimahaas fulinaya sida Boliska waxaanu u sheegaynaa inay yihiin dad UDUB ka tirsan oo Boliska u dhexeeya, haddii aanu wadanka qabanana ha ogaadaan inaanu bedeli doono, waayo maaha Bolis ee waa siyaasiin UDUB ah.” ayuu yidhi Faysal Cali Waraabe.
Waxa kale oo uu si adag uga hadlay shir ay habeenimadii jimcihii guriga shaqaalaha ku qabteen Wasiirada Duulista, Maaliyada, Hawlaha guud iyo Wasiir ku xigeenka cadaaladda, oo ay u qabteen dhallinyaro ka soo jeeda Beelaha Habaryoonis, waxaanu yidhi, “Wasiirada dhallinyarada reer ahaan ula shirayna waxaanu leenahay sidee ayay shacabku idinku aaminayaan haddii aad beeshiinii si gaar ah ula shirteen, mana tihidin wasiiro qaran ee waxaad tihiin wasiiro qabiil.”
Isagoo la hadlaya mucaaradka, waxa uu yidhi, “Mucaaradka waxaan leeyahay waxan foosha xun ee ay UDUB dadka ku wado waa inaan lagaga dayan, waxanan u sheegaynaa inay iska ilaaliyaan ardayda jaamacaduhu siyaasiyiinta reer reerka u kala saaraya. Markaas annagu waanu ka soo horjeednaa waxyaabahaas, reer hebel baa igu soo biirayna waa laga wanaagsanyahay, waxaana loo baahanyahay in aad umadda barmaamijkaaga siyaasiga ah ka iibisid ee looma baahna inaad tidhaahdo reer hebel baa igu soo biiray.”
Waxa uu ugu dambayn guddoomiyaha UCID sheegay in dhallinyarada sheegtay inay ku biireen xisbiga KULMIYE, qaar ka mid ahi wada hadalo u socdeen xisbiga UCID, “Qaar ka mid ah dadka meesha fadhiyay waxa noo socday wada hadal, waanan iska war haynaa. Dhallinyarada Oodweyne iyo galbeedka Burco way ogyihiin inaan xildhibaano la dooranayn oo aanay doorashadu tii xildhibanaada ahayn ee ay tahay tii la dooranayay Madaxweynaha.” ayuu yidhi Faysal Cali Waraabe.
Source:Geeska Afrika
