Muqdisho (Alshahid)-Ururka Alshabab ayaa markii ugu horaysay si cad u dafiray jiritaanka calanka Soomaaliyeed ee uu dalku yeeshay markii uu xoriyadiisa ka qaatay gumeystayaashii Ingriiska iyo Talyaaniga.
Afhayeenka Alshabab; Sheekh Cali Maxamuud Raage (Cali Dheere) oo waraysi uu kaga hadlayo xuska maalinta xoriyada ay qaateen goboladii Waqooyi ee dalka oo ku aadan 26ka June siiyay idaacada Al-Furqan oo ah idaacad maxali ah kuna hadasho afka Alshabab ayaa sheegay in calanka buluug ah ee xiddigta dhexda kaga taala uu yahay mid laga dhaxlay gumeystayaashii.
“Calanka buluug ah ee xiddigta dhexda kuleh waxaa laga dhaxlay gumeestayaashii Talyaaniga iyo Ingriiska, iyagaa keensaday, sababna waxa ay u ahaayeen in dalka laga taago, calankeena waxa uu kasoo jeedaa saxaabadii iyo Nabiga NNKH” Ayuu yiri Sheekh Cali Dheere.
Sidoo kale Cali Dheere ayaa ku tilmaamay dadka aaminsan maalinta xoriyada Soomaaliya in ay yihiin kuwo aanan lahayn caqiido Islaami ah oo kufilan ayna u baahan yihiin in ay ka baxaan dambiga ay kujiraan.
Afhayeenka ayaa sheegay in aysan jirin wax layiraahdo xuska maalinta xoriyada taasina ay tahay mid ay dajiyeen gaalada cadowga ku ah ummada Islaamka waa sida uu hadalka u dhigaye.
Waa markii ugu horeysay ee si cad ay Alshabab u inkiraan jiritaanka calanka Jamhuuriyada Soomaaliyeed iyada oo horay loogu eedeeyay Alshabab in ay meelaha ay ka taliyaan ka taagaan calan iyaga u gaar ah ayna dajiyaan calanka Soomaaliya.
Xogta: ALSHAHID
