Guddoomiyaha Komishanka Oo Faahfaahin Ka Bixiyey Waxyaabihii U Suurto Geliyey Inay Si Fudud Uga Baxaan Hawshii Doorashada Madaxtooyada.
Hargaysa (Ramaasn) July 4, 2010 - Guddoomiyaha Komishanka Doorashooyinka qaranka Ciise Yuusuf X. Maxamed (Ciise Xamari), ayaa faahfaahin ka bixiyey qaabkii ay ugu suurto gashay hawshii balaadhnayd ee Doorashada Madaxtooyada, taas oo ay ku dhawaaqeen natiijadeedii, isla markaana ay ku qanceen labadii Xisbi ee ku guulaysan waayey aqlabiyada kalsoonida shacbiga Somaliland.
Gudoomiyuhu waxa uu sheegay inay maanta maxkamada sare u gudbiyeen natiijadii codbixinta doorashada madaxtooyada ee uu ku guulaystay Madaxwayne Axmed Maxamed Maxamuud Siilaanyo iyo ku xigeenkiisa Cabdiraxmaan Cabdillaahi Ismaaciil Saylici, isagoo xusay in Xisbiga dacwad qabaa uu tagi uu ka furan karo Maxkamada oo marka u dambaysay go’aanka Komishanka ansixinaysa, hase yeeshee Guddoomiyaha Komishanka waxa uu xusay in aanay wakhti xaadirkan Xisbi dacwad qaba amaba ku qanci waayey natiijadii ay ku dhawaaqeen.
Guddoomiyahah Komishanka doorashooyinka qarnka Ciise Yuusuf X. Maxamed (Ciise Xamari”), waxa kale oo uu sheegay in muddadii ay ku jireen hawsha doorashada Madaxtooyada ay qayb wayn ka qaateen Saddexda Xisbi qaran, Shacbi waynaha reer Somaliland iyo ciidamada qaranka Somaliland, kuwaas oo uu sheegay inay ahaayeen waxa kaliya uu suurto geliyey inay si fudud uga baxaan hawshii doorashada madaxtooyada iyo ku dhawaaqista natiijadii ay Saddexda Xisbi kala heleen.
Ugu dambayntiina waxa uu sheegay Guddoomiyaha Komishanku in marka faraha kala baxaan Hawsha doorashada madaxtinnimada dalka ay uga gudbi doonaan Doorashooyinkii golayaasha deegaanka.
Ramaasnews Desk
Hargeisa.
