Weftigii Meeqaam ahaan ugu Sarreeyey Midowga Yurub oo la Filayo inay Dhawaan Booqasho ku Yimaaddaan Somaliland
Xogyaha arrimaha dibedda KULMIYE iyo wasiir-ku-xigeenka Qorshaynta oo Nairobi kaga qaybgalay shir ay qabanqaabiyeey Midawga Yurub iyo IGAD
Nairobi (Jam)- Wefti Culus oo noqonaya kii meeqaam ahaan ugu sareeyey Midowga Yurub, ayaa la filayaa in ay dhawaan booqasho rasmi ah ku yimaaddaan Somaliland.
Sida lagu sheegay qoraal uu xoghayaha arrimaha dibedda KULMIYE Dr. Maxamed Cumar Cabdillaahi xalay u soo diray Jamhuuriya, isaga oo ku sugan magaalada Nairobi ee dalka Kenya oo uu kaga qaybgalay shir ay si wada jir ah u qabanqaabiyeen Midawga Yurub iyo Urur-goboleedka IGAD, waxa dhawaan iman doona Somaliland madax ka socota ururka ay ku bahoobeen dalalka reer Yurub ee EU-da, kuwaasi oo noqon doona weftigigii ugu sareeyey dhinaca Midawga Yurub ee Somaliland yimaad.
Qoraalka uu Dr. Maxamed Cumar Cabdillaahi soo saaray waxa uu kaga xogwaray shir ay isaga iyo wasiir-ku-xigeenka Qorshaynta Somaliland Md. Axmed Xaashi Cabdi kaga qaybgaleen magaalada Nairobi, kulamo uu la yeeshay wasiiro ka tirsan dawlada Kenya iyo go’aan laga gaadhay fulinta mashruuca dhismaha wadada isku xidha Berbera iyo Tog-wajaale ee loo yaqaano ‘Berbera Corridor’. Qoraalkaa oo faahfaahsana waxa uu u qornaa sidan;
“Wefti aan hoggaminayo oo uu ka mid yahay Axmed Xaashi, wasiir-ku-xigeenka qorshaynta iyo Iskaashiga Caalmiga ah ee ee maamulka Rayaale, ayaa bishan 10 keedii u dhoofaynay magaalada Nairobi ee dalka Kenya, ka dib markii maamulka cusub ee madaxwayne Axmed Siilaanyo uu helay casuumad rasmi ah oo uu kaga qaybgalayo shirwayne ay qaban qaabiyeen urur-goboledka IGAD iyo ururka Midowga Yurub.
Shirkan oo ay ka qaybagaleen wsiirro iyo masuuliyiin ka socday lix waddan oo ka tirsan bariga iyo Geeska Afrika oo kala ah Itoobya, Kenya, Jabuuti Yuganda, Sudan iyo Eritriya, waxana lagaga hadalay arrimo la xidhiidha mashaariicda horumarinta ee Gobolka Geeska Afrika oo uu ka mid yahaya mashruuca dhismaha waddada isku xidha Berbera iyo Togwajaale ee loo yaqaan "Berbera Corridor."
Weftiga Somaliland waxay shirwaynhaasi ka warrameen faa’iidada dariiqaasi u yeelan doono isku xidhka dalka Somaliland iyo waddamada Geeska Afrika iyo waxtarka dhaqaale ee uu ku soo kordhin doona mandaqadda Geeska Afrika, waxayna shirka ku boorriyeen in la dardargaliyo hawlgalka mashruucan, iyadoo shirkaasi lagu caddeeyay in mashruucaas Midowga Yurub u arko mid muhim ah, laguna talo jiro fulintiisa dhawaan, sidaa awgeed waxa la go'aansaday in 28 bishan July lagu ansixin doona fulinta mashruucaas magaalo madaxda dalka Bilguim ee qaarada Yurub.
Intaan joognay magaalada Nairobi, waxaan la kulmay, shirka ka sokow, safiirka dalka Sweden ee fadhiya Kenya, wasiirka tamarta iyo wsiirka waddooyinka ee Kenya, safaarada Maraykank iyo madaxda Midawga Yurub ee bariga Afrika oo dhammaantood kala hadlay guusha ay shacabka reer Somaliland ka soo hooyeen doorashadii madaxtooyada ee 26 June 2010 dalka ka dhacday, baahida qaran ee Somaliland u baahan tahay inay iskaashiga horumarineed la yeelato bulshada caalamka iyo iskaashiga ilaalinta xasiloonida mandaqadda.
Waa markii ugu horaysay oo ay madax ka socota Somaliland ka qayb galaan shirarka urur-goboleedka IGAD, waxaana la filayaa in madaxda ka socota Midawga Yurub ay dhawaan booqosho ku iman doonaan Somaliland oo iyadoo noqon doonta waftigii ugu sarreeyay ee ka socda Midawga Yurub ee dalka yimaada.”
Jamhuuriya Online
