Dhawrkii malmood ee u danbeeyey, ayaa waxa magaalada Berbera si weyn looga hadal hayay warar isa soo taraya, kuwaasoo sheegaya in Madaxweyne Siilaanyo uu socdaal ku tegi doono magaalada Berbera ee Xarunta Gobolka Saaxil.
illaa hadda ma jiraan warar si rasmiya oo xaqiijiayay socdaalka Madaxweynaha ee la tibaaxayo iyo ujeedada rasmiga ah ee ka danbaysa, balse waxaa jira dhaqdhaqaaqyo loogu diyaar-garoobayo safarka Madaxweynaha oo ka muuqda meelo ka mid ah magaalada Berbera, gaar ahaan mid ka mid ah xeryaha xoolaha ee Shirkadda Indhadeero Company, halkaasoo la sudhay sawirada madaxweynaha iyo hal-ku-dhigyo lagu soo dhawaynayo Madaxweynaha. taasoo lagu wado in ujeedada ugu weyn ee Madaxweynuhu ku tegayo Berbera lagu xidhiidhinayo sidii uu xadhiga uga jari lahaa xeradaas xoolaha oo ay dib u dhis casri ah ku sammaysay Shirkadda Indhadeero.
Xeradan oo ahayd mid mudoba ay dedaal ugu jirtay Shirkadda Indhadeero sidii ay uga dhigi lahayd maxjar labaad oo ka hirgala magaalada Berbera, ayaa xukuummadii hore ee Madaxweyne Rayaale ay gaashaanka ku dhufutay hireglintiisa una cuntami waayay, haseyeeshee sida muuqata immika intii xukuumadda Madaxweyne Siilaamyo ku guulaysatay talada dalka uu soo noolaaday dhismaha dhaqdhaqaaqyadii ay shirkadda Indhadeero ku doonaysay sidii maxjar uga dhigi lahayd maxjar u gaara, taasoo tan iyo intii ay dhaqdhaqaaqyadani dib u soo cusboonaadeen ay bulshadu si weyn isu weydiinayeen suurtogalnimada damaca shirkadda Indhadeero ku doonayaan maxjar u gaara ganacsiga xoolahooda, kaasoo aan illaa hadda la ogayn heerka kalsoonida uu maxjarkani ka haysto suuqyada loo dhoofiya xoolaha ka baxa Berbera, kuwaasoo inta lka ogyahay si buuxda u aqoonsaday Maxjarka Berbera ee ay maamusho shirkadda Golf Internatioal ee maalgelintiisa ay wadajirka u fuliyeen Ganacsade Al-jaabiri oo isagu halgan dheer u galay sidii ay Somaliland u kasban lahayd maxjar caalamiya oo kalsooni iyo shahaado caalamiya oo caafimaad haysta, kuna guulaystay midho-dhalkiisa.
si kastaba ha ahaatee, waxaa la dhawrayaa waxa uu ku danbayn doono hirgelint maxjarka Indhadeero iyo waxa ka dhab ah xadhig-ka-jarista madaxweynaha oo sida ogyahay shirkadda Indhadeero Company ay ka mid ahayd ganacsatadii sida weyn uga dhexmuuqatay ololayaashii xisbiga KULMIYE ku raacdaynayay sidii uu ugu guulaysan lahaa kursiga madaxtooyadda.
hadaba, su'aasha isweydiinta leh waxay tahay waxa uu noqon doono sharciyadda lagu maamuli doono maxjarka cusub oo dad badani u arkaan inay fikirka maxjarkan uu ka danbeeyo Ganacsato Carbeed oo ka soo horjeeda Maxjarka ay hiregelisay shirkadda Golf International.
