Sheekadiiso waa ha ii Daba gelina
Wasiirkii hore ee Wasaaradda Maaliyadda xukuumaddii talada lagaga guulaystay ee UDUB Md. Xuseen Cali Ducaale (Cawil), ayaa masrixiyad iyo kalsooni-darro ku tilmaamay shir-wadareed ay si wadajir ah saxaafadda ugula hadleen Isniintii toddobaadkan toddoba wasiir oo ka tirsan xukuumadda Madaxweyne Axmed Siilaanyo.
Md. Cawil waxa uu sheegay sababta wasiirradaasi tirada intaa le’eg isugu garab-fadhiisteen u muuqato kalsooni-darro haysa, balse ay ahayd in wasiir waliba si gooni ah uga waramo wasaaraddiisa iyo waxqabadka uu soo kordhiyey. Waxaannu is barbardhig ku sameeyey qaabkii wasiirradii xukuumadda Rayaale ee uu ka tirsanaa warbaahinta ula hadli jireen iyo sifaha toddobadaas wasiir ee xukuumaddan cusub u hadleen oo uu ku tilmaamay qaar kala fog.
“Wasiirradii xalay (habbeen hore) halkaa fadhiyey waxaan u arkay inay masrixiyad inoo sameeyeen, riwaayad oo kale, waxa weeye wasiir walba waxa loo baahan yahay inuu kelidii hadlo oo uu ka waramo wasaaraddiisa iyo wixii uu u kordhinayo, toddoba wasiir baa isa soo ag-fadhiistay oo aad moodaysay inay kalsooni-darro tahay, waayo dawlad baanu ahayn shan wasiir marnaba may fadhiisan jirin (shir jaraa’id wada qaban jirin),” ayuu yidhi Xuseen Cali Ducaale oo waraysi siiyey Warbaahinta.
Mr. Cawil waxa kale oo uu ka hadlay natiijada ka soo baxday guddi Wasiirka cusub ee Maaliyadda Eng. Maxamed Xaashi u saaray dayntii uu isagu hore uga tagay, taas oo ay sheegeen in aanay waxba ka jirin.
Isagoo arrintaa ka hadlayeyna waxa uu yidhi, “Dawlad weliba waxay ku wareejisaa xukuumadda cusub dayn, dawladda Maraykanka haddaynu eegno Obama waxa uu Bush ku ku wareejiyey lacag aan la sheegi karin, dawladuhuna daynta way isku wareejiyaan, dawladnimada ayaanay ka mid tahay.
Waxa Maxamed Xaashi ka khaldan daynta waxa loo galaa waa qara, afar doorasho ayeynu galnay, Laascaanoodna waynu gaadhnay, diiwaangelintii bariga waxa nagu soo hagaagay doorashadii u dambaysay oo ugu yaraan halkii laba malyuun iyo badh doollar qaybteenu ahayd, waxay nagu noqotay saddex malyuun iyo dheeraad.”
Wasiirkii hore ee Maaliyaddu waxa uu ku dooday in xukuumaddii uu ka tirsanaa ay ka tagtay nidaam dawladeed iyo dal dhammaystiran, isla markaana sharaftu ku jirto in dawladda cusub halkaasi ka sii wado, “Dawladdan waxa laga sugayey oo sharaftu ahayd dawlad baanu annagu ahayn dalka halkaas ayaanu soo gaadhsiinay, waanu isku haynay, ciidan maanta aynu ku faani karno ayaanu dhisnay, maamulku ma dhaafi jirin Burco, laakiin Laascaanood ayaanu dhaafinay.”
Xuseen Cali Ducaale, waxa uu Madaxweyne Siilaanyo kula taliyey in haddii uu iska ilaaliyo nidaamka beelaha, si uu ugu guulaysto talada dalka, waxaannu yidhi, “Dalalkan Afrikaanka ah ama innagaba hawsha culus ee u taala ee loo baahan yahay si geesinimo leh inuu u waajaho waxa weeye inuu beesha uu ka soo jeedo iska xakameeyo oo aan loo aanayn oo culays wayni kaga imanayo, waanu ku dooranay, wax baanu kuu qabanay ee waa in aad naga aqbashaa, waa in aad wax noo dhiibtaa, haddii taa uu iska xakameeyo waxaan qabaa inuu wax badan oo kalsooni ah uu helayo, hawshuna u fududaanayso,” ayuu hadalkiisa ku soo xidhau wasiirkii hore Maaliyaddu
