Mudane Aw Daahir Xaaji Xasan, oo ka tirsan mudanayaasha Golaha Guurtida, ayaa la sheegay in la qorshaynayo sidii xubinimada looga xayuubin lahaa, ka dib markii lagu eedeeyay inuu taageero dhaqaale u ururiyay maleeshiyo beeleedka SSC.
Ma jiro war rasmi ah oo ka soo baxay Golaha Guurtida Somaliland, waxase ay warar xogogaal ahi Geeska Afrika u sheegeen in guddiga joogtada ah ee Golaha Guurtidu ay diyaarisay sidii mudanahaas oo Golaha ugu jira xubin sharaf ahaan xilka looga xayuubin lahaa, ka dib markii ay heleen warar xaqiijinaya in xildhibaankani ka qayb galay kulamo ka dhacay Lascanod oo dhaqaale loogu ururinayo maleeshiyadaas oo dhawr goor weeraro gaadmo ah ku soo qaaday ciidamada bariga degen ee Somaliland. Waxaana la filayaa in fadhiga u horeeyay ee golaha guurtida la soo hordhigo mawduuca Aw Daahir iyo eedaymaha loo jeedinayo, markaas oo ay mudanayaasha golaha Guurtidu u codayn doonaan in xilka laga qaado iyo in kale. Xildhibaan Aw Daahir oo aanu isku daynay inaanu arrintan wax ka weydiino ayaanay noo suurtogelin, waxase la sheegay in sida ugu dhaqsaha badan mawdiiciisa golaha loo horgayn doono, waxaanu sidoo kale masuulkani aabo u yahay Maayarka magaalada Lascanod.
Maleeshiyaadka SSC, ayaa weeraro hagar daamo ah oo ku dhufo oo ka dhaqaaq ah ka fuliya bariga Somaliland, gaar ahaan jiidda u dhaxaysa Buhodle iyo Lascanod, waxaanay shuruud ku xidheen baaq wada hadal ah oo uu Madaxweynaha Somaliland ugu baaqay, iyagoo xusay in ciidamada Somaliland wada hadalka ka hor ka baxaan gobalada Sool iyo Buhodle, waxaana jira warar soo baxaya oo sheegaya in Madaxweynuhu dib ugu noqday siyaasadii uu doonayay inuu kula macaamilo jabhadaas, oo maalmo ka hor weerar gaadmo ah ka fulisay kaantaroolka bari ee degmada Oog, halkaas oo ay dhimasho iyo dhaawac ugu gaysteen askar gaadh haysay.
