-Madaxweynaha Somaliland Md. Axmed Maxamed Maxamuud [Siilaanyo] ayaa markii ugu horeysay si maqal iyo muuqaal ah uga wareystay xaalada nololeed ee ay Gobolada dalku ku sugan yihiin qaar ka mid ah Maayarada iyo Guddoomiyayaasha gobolada dalka, kadib markii shirkada TELESOM u suurtagelisay qalab casri ah oo ay soo kordhisay adeegeedi hore.
Madaxweynihii Axmed Siilaanyo masuuliyiinti iyo Madaxdii Shirkada Telesomo Oo Maqalkii iyo muuqaalkii daawanaya
Qalabkan casrig ah, ee ay Shirkada Isgaadhsiinta Telesom ku soo kordhisay adeegeedii hore oo la yidhaahdo Video conferencing (Maqal & Muuqaalka Shirarka) oo ay maanta ku soo bandhigtay furitaankii carwada 5aad ee Caalamiga ah ayaa guud ahaan-ba ka yaabisay dadweynihii iyo masuuliyiintii ka soo qeybgalay furitaankii carwada, kuwaas oo ku dhaygagay, isla markaana la amakaakay kadib markii ay ku baraarugeen Madaxweyne Siilaanyo oo dhoola-cadeynaya wajigiisana ay ka muuqato farxad iyo niyad wanaag uu ku xaal-wareysanayo si maqal iyo muuqaal ah xaalada nololeed iyo dhaqan-dhaqaale ee ay ku sugan yihiin dhamaan-ba saaka dadweynaha reer Somaliland ku nool Gobolada dalka qaarkood.
Maayarada iyo masuuliyiinta Gobolada dalka ee uu madaxweynihii kala hadlay qalabka Casriga si maqal iyo muuqaalah ayaa wakhtiga ku sugnaa xarumaha Shirkada Telesom ku leedahay Magaalooyinka Ceerigaabo, Laascaanood, Burco, Berbera iyo Boorama, kuwaas oo si toos ah isku arkaya Madaxweynaha shaashad weyn ee la yidhaahdo Video conferencing iskaga waraystay xaaladaha Gobollada dalka, isla markaana wuxu salaan u mariyey dadweynaha ku nool Gobollada kala duwan ee dalka.
Muuqaalka adeega Casriga ah ee Video conferencing
Madaxa suuqgeynta Shirkada Telesom Mr. Cali Maxamed Saalax [Cajab] oo ka hadlayey qalabka casriga ee Shirkadoodu lu soo bandhigtay carwadan caalamiga ah ee laga furey aqalka hay’ada shaqaalaha dawlada ee Magaalada Hargeysa, ayaa waxa uu yidhi “Shirkada Tesom waxay ka soo qeybgashay Carwada 5aad ee Sanaacaadka wadaniga ah ee dalka, waxaanan kala soo qeybgalnay oo aanu ku soo bandhignay adeegyo casri iyo kuwii hore-ba ee ay Shirkadu dadka u heysay ee uu danbeeyey adeeqi casriga ah ee QARAN/ZAAD ahaa ee shalay aan soo bandhignay, kaas oo ah nidaam casriga oo dadweynaha u sahlaya in lacagaha aduunka oodhan lagu xawili karo mobile-ka qofkasta oo isticmaala adeega Zaad Service”
“Waxaanu soo bandhignay adeega Video conferencing oo ay gobolada dalka ay soo fadhiisteen badhasaabadii dalka, dabadeed-na markii uu madaxweynuhu khudbadiisa dhameeyey uu badhasaabyada iyo odayaasha Gobolada dalka uu kala hadlay qalabka si maqal iyo muuqaalba ah qalabka Video conferencing, isaga oo wax ka weydiiyey xaladooda nololeed, sida ayihiin, kana bogaadiyey, isla markaana sheegay inay carwadani ku furantay si nabadgelyo ah dalkana si nabadgelyo ah ugu dhamaatay, waxaana suugtageliyey qalab casri ah oo la yidhaahdo Video conferencing oo ah dalka gudihiisa doonayna inaanu ka suuta-gelino dalka dibadiisa,”ayuu yidhi Cajb oo ka waramayey qorshaha Shirkada Telesom.
Madaxweyne Siilaanyo iyo masuuliyiintii Dawladiisa ahayd oo la amakaakay qalabkii Casriga ahaa ee Shirkada Telesom soo bandhigtay ee ahaa Video conferencing
Mar uu cajab ka hadlayey qalabkan casriga ah ee la isku arkayo maqalka iyo muuqaalka cida uu faa’iido u leeyahay waxa uu yidhi “Waxay faa’iido u noqon doonta waxbarashada, oo professor-ada jaamacadaha aduunka jooga ay halkan ka bixin doonaan casharo, iyaga oo isticmaalaya qalabkan casriga ah ee Video conferencing . waxyaabo badan oo aanu jabinay ayaan ku soo bandhigayna Cards ha ahaadeen, ama Mobilo ha ahaadeen, “
Sidoo kale, Wasiirka Wasaarada Ganagacsiga, Warshadaha iyo Dalxiiska Somaliland Md Cabdirisaaq Khaliif Axmed oo Adeegan casriga ah Kahadlaayey ayaa waxa uu yidhi “Horumarka ganacsi ee aynu samaynay waxa ka mid ah horumarka xagga technology-ga oo aynu maanta halkan inoogu soo diyaarisay shirkada isgaadhsiinta Telefoonada TELESOM adeeg casriya oo ah kamaro Online ah, oo aynu kala xidhiidhi doono gobolladii dalka oo dhan, haddii aynu u baahano iyagoo masuuliyiintii qaranka u sareeyeyna ay indhahooda ku arkeen”.
Qalabkan Casriga ah ee Shirkada Isgaadhsiinta Telefoonadu soo bandhigtay maanta ayaa ah, adeegi ugu horeeyey ee noocisa ah, kaas oo dadweynaha u sahlaya inay cida ay la hadlayaan si maqal iyo muuqaal ah isku arki doonaan gobolada dalka, taasina waxay ka mid ah xawliga horumarka dhinaca Technology-yada ah ee Somaliland wakhtiyadan ku socoto.
And to think that when we used to do some phone conferences here, Xamud always sounded like he was calling from a phone box in galkacyo 
