Hargeysa(Yool)-Wasiir-Ku-Xigeenkii hore ee Caddaalada Yuusuf Ciise Ducaale (Talaabo), ayaa sheegay in aanay ilaa iyo hadda Xukuumadan cusub soo bandhigin wax la taaban karo oo ay ka qabatay mudadii ay talada dalka gacanta ku haysay.
Talaabo oo warbaahinta ugu waramayay Huteel KAAH, ka dib munaasibadii Xukuumada Somaliland shalay kusoo bandhigtay waxyaabihii u qabsoomay boqolkii maalmood, waxa uu sheegay in ay masuuliyiinta Xukuumada cusub ay had iyo jeer la soo taagan yihiin dayn ay Xukuumadii hore ka dhaxleen, balse ay hadda mid kale madaxa la galeen.
Waxa kaloo Md. Talaabo uu saluug ka muujiyay soo dhaweyntii Madaxweyne Siilaanyo iyo waftigiisa ay kala kulmeen Madaxweynaha dalka Jabuuti Ismaaciil Cumar Geelle, taasoo uu ku tilmaamay inay ahayd mid huwan shaadh ka duwan kan lagu yaqaan dibloomaasiyada, isagoo arintaa ka hadlayna waxa uu yidhi: "Labadii gacmood ee isa salaamayay ee Xisbiga KULMIYE astaanta u ahaa waxa la leeyahay hadda way isu dhow yihiin, mana hubno laakiin waa xanshaashaqa Magaalada"
Md. Talaabo oo ka hadlaya dedaalkii ku saabsan dhinaca aqoonsi raadinta, waxa uu sheegay in Xukumadii hore ee uu ka tirsanaa ay isku hawli jirtay sidii ay beesha caalamka uga heli lahayd aqoonsi Somaliland, balse Xukuumadan cusubi aanay haysan aqoonsigii gudaha. "Anagu (Xukuumadii hore) aqoonsigii dibada ayaanu la’ayn, laakiin tani (Xukuumadda Cusub), aqoonsigii gudaha ayay la’dahay."
Sidoo kale, Yuusuf Ciise waxa uu ku sifeeyey waxaan waxba ka jirin soo dhoweyntii Madaxweyanaha Jabuuti ku qaabilay wefdigii Madaxweynaha Soamliland ee dhowaan booqashada ku tegay dalkiisa, isagoo faah-faahinaya waxa uu yidhi: "Markii hore waxa laga qaylinay dayn, haddana dayn baan ku wanqalayaa, waxaasi maaha wax lala yimaado ee maxaad qabatay, Rooga halkaas la dhigayna (Soo dhaweyntii madaxweynaha ee dalka Jabuuti) anigu Cable-baan u arkaa, waayo gaadhigii lagu qaaday Madaxweynuhu calan muu lahayn, haddii gaadhiga lagagu martiqaaday calanka la soo sudho waa macne, haddiise roog uun laguu dhigo dee waa Cable-kii uun."
