Saaxibkay Muuse Biixi waxaan ku leeyahay dagaalkii Marya Aloolka iyo Federaalka ayaan si wanaagsan uga soo bixine, Cismaan-Kaluun xaq...”Ismaaciil Buuba
Ismaaciil Maxamuud Hurre [Buubaa] oo ah Siyaasi xilal kala duwan ka soo qabtay Dawladihii kala dambeeyey ee soo maray Dawladi kumeelgaadhka Soomaaliya ayaa soo dhaweeyey nidaamka qarsoodiga ah ee uu Somaliland ku yimid Cismaan-Kaluun,isla markaana waxa uu ku tilmaamay fikir khalad ah hadalkii ka soo yeedhay Guddoomiyaha Xisbiga KULMIYE Muuse Biixi Cabdi eek u aadan Socdaalka Siyaasigan.Siyaasigan ruugcadaaga ah waxa uu ka hadlay aragtidiisa ku aadan socdaalkii uu dhawaan ku tagay Madaxweynaha Somaliland Md. Axmed Maxamed Maxamuud (Siilaanyo), wadada ugu haboon ee ay aqoonsi ku heli lahayd Somaliland iyo arrimo kale oo badan.
Ugu horeyn Ismaaciil Buubaa oo ka hadlayey Socdaalkii dhawaan uu Madaxweynaha Somaliland ku Tagay dalka Jabuuti, ayaa waxa uu yidhi “Safarka uu jabuuti ku tagay Madaxweynaha Somaliland Axmed Maxamed Maxamuud [Siilaanyo] dhawaan waajibkeedi way ka soo baxday oo si fiican oo wanaagsan ayey u soo dhaweysay. Madaxweynaha Somaliland-na way haboonayd inuu dawladaha jaarka uu tago,”
“Jabuuti waa dad walaalaheena ah,waa dal jaarkeena ah, waa dal dhisan oo loo baahanyahay”ayuu ku yidhi Ismaaciil BuubaaWareysi uu maanta siiyey Telefiishanka Caalamiga ah ee Horn Cable TV,isaga oo wakhtiga ku sugna Magaalo Madaxda dalka Nairobi ee Kenya.
Mar uu Ismaaciil ka hadlayey arrimaha Somaliland waxa uu yidhi“Soomaali kala tagisteeda iyo wada joogisteedu [Somaliland iyo Soomaaliya] waa arrin Soomaali u taala, Somaliland waxay ila tahay ictiraafkan sidiisaba dabada laga raadinayo maaha dariiqi haboona,”
Mr. Buuba waxa uu ku taliyey oo uu yidhi “Waxa loo baahan yahay inay dadka Soomaalidu isuku yimaadaan [Somaliland iyo Soomaaliya], oo ay wada fadhiistaan, In sidii 1960-kii la isugu yimid in la ahaado iyo la kala tago waa arrin dadka Soomaaliyeed u taala.”
“Somaliland Ictiraafkeedu kuma xidhna dibadda, ee waa mid ay iyaddu gacanteeda ku haysato, waa mid inta ay Soomaali isugu yeedho ay ku qancin karto,”ayuu yidhi Buubaa.
“Waxay ila tahay Somaliland inay iyadu ku haboonayd, marka hore siyaasadeeda oo qeexan oo ay u bandhigtay oo ay hubto inay Soomaali iyo Caraba u soo joogsadaan oo ay saaxada la timaado”
Ismaaciil Buuba waxa uu kula taliyey oo uu yidhi“Waxaana looga baahan-yahay Madaxweynaha Somaliland Md. Axmed Maxamed Maxamuud [Siilaanyo] iyo Wasiirka arrimaha dibada Maxamed Cabdilaahi Cumar, inay Siyaasad qeexan oo meel-mar ah, oo Somaliland u cuntami karta oo Soomaali u cuntami karta la timaado”
Mar uu Ismaaciil ka hadlayey aragtidiisa ku aadan Imaanshiyaha Caasimada Somaliland ee Hargeysa Siyaasiga Cismaan-Kaluun waxa uu yidhi “Aad iyo aad ayaan u soo dhaweynayaa, qudheydu waan ku sii socda oo waan tagi doona, Laakin haddal uu ka dhawaajiyey Guddoomiyaha Xisbiga KULMIYE Muuse Bixii muu ahayn mid meesha yaalay, Saaxibkay Muuse Biixi waxaan ku leeyahay dagaalkii Marya aloolka iyo federaalka ayaan si wanaagsan uga soo bixine, Cismaan-Kaluun xaq ayuu u leeyahay inuu yimaado [Somaliland], xaq ayaan u leeyahay inaan anniguna[Ismaaciil Buuba] tago. Siyaasiyana fikir waad yeelan kartaa, laakin marka ay noqoto danta ummadaada cid taariikh ahaan iyo halgan ahaan cid nooga wanaagsan ma jirin,”
Waxaanu yidhi “Danta Somaliland maanta waxay ku jirtaa inay ka mid noqdaan ummada Soomaaliyeed, oo ay hogaamiyaan oo fursad ayaa jirta, oo ay ummada Soomaaliyeed diyaar u wada tahay oo haddii la doonayo inay Magaalada Hargeysi noqoto Magaalo madaxda [Soomaaliya] la doonayo, Haddii Madaxweynuhu ka soo jeedo Somaliland diyaar loo yahay”.
“Saxaafadda ciddi cabudhisa, waa qof isagu is cabudhiyey,”ayuu yidhi waxaanu Ismaaciil si faah-faahsan uga hadlay go’aamadii dhawaan ka soo heshiiskii lagu kala saxeexday Magaalada Widhwidh.
