Somaliland budget increased by 45% in 2011 compare to 2010
Maaliyadda Oo G. Wasiirrada u Gudbisay Miisaaniyad Ka Badan 45% Tii Kal Hore
January 24th, 2011
Hargaysa (Somaliland.Org)- Wasaaradda Maaliyadda Somaliland ayaa shalay golaha wasiirrada u gudbisay odoroska miisaaniyad sannadeedka 2011 ee xukuumadda dhexe, kaas oo sida la sheegay miisaaniyaddii sannadkii hore ka badan 45% .
Ma jiro war rasmi ah oo wasaaradda maaliyaddu ay ka soo saartay tafaasiisha odoroska miisaaniyadda, hase yeeshee, ilo xogogaal ah oo aanu ka helnay wasaaradda maaliyadda ayaa sheegay in shalay wasaaraddu u gudbisay golaha wasiirrada, si ay u guda-galaan ansixinta miisaaniyadda, kadibna loo gudbiyo maalmaha soo socda aqalka Wakiillada.
Miisaaniyaddan ayaa la sheegay in ay miisaaniyd sannadeedkii hore ka badan tahay boqolkiiba shan iyo afartan iyada oo aanay jirin wax cashuuro ah oo xukuumadda cusubi ay kordhisay.
Miisaaniyaddan ayaa xooga saartay mushahar kordhinta shaqaalaha dawladda iyo ciidamada oo loo kordhiyay 100 %, (Boqolkiiba boqol), waxa mushahaarooyin loo qoray 1500 oo macalin, 400 iyo dheeraad ka mida hawl wadeenada caafimaadka iyo shaqaale badan oo loo qoray wasaaradda diinta iyo Awqaafta, isla markaana ay jiraan qaar kamida Hay’adaha dawliga ah ee uu madaxwaynuhu curiyay aasaaskooda, oo loo qoray shaqaale kala duwan, sida Hay’adaha maamul wanaaga iyo ilaalinta tayada agabka.
Wasaaradda ayaa odorosaysa in lacagtan ay kordhiyeen ka soo bixi doonto cashuurihii ku baaqan jiray ganacsatada waawayn, sida shirkadaha isgaadhsiinta, xawaalada iyo maal-qabeenada.
Miisaaniyaddan ayaa ka duwan miisaaniyadihii hore, waxaanay noqonaysaa guul wayn oo u soo hoyatay wasaaradda maaliyadda oo kordhisay mushaharkii shaqaalaha iyo ciidamada, iyada oo aanay jirin cashuuro lagu kordhiyay dadwaynaha.
