Sarkaalkan reer Somaliland ee kaalinta koowaad u galay jaamacada milatariga Itoobiya ku bartaan culuumta caafimaadka, ayaa waxa bilad dahab ah ku maamuusay raysal-Wasaare Males Zanawi oo muujiyey sida uu ugu faraxsan yahay kaalinta uu galay.
War-saxaafadeed kooban oo uu maanta soo saaray Taliyaha guud ee ciidamada qaranka Somaliland oo soo gaadhay shabakada wararka ee RAMAAS ayaa isaga oo dhamaystiran waxa uu u dhignaa sidan “Bishan June ee aynu ku jirno 11-keedii waxa lagu qabtay guriga Raysal wasaaraha dalka Itoobiya xaflad balaadhan oo ay ka soo qeyb galeen marti sharaf badan oo ka socota dalka Itoobiya, Safiirro,Milatari Attach-yo iyo madax badan.
Xafladaasi waxa loogu xidhayay 70 dhakhtar oo dhamaystay waxbarasho caafimaad, Jamhuuriyada Somaliland waxay ku lahayd ardaydaasi toban dhakhtar oo ka tirsan ciidanka qaranka oo dhamaystay waxbarashadaasi oo qaadanayay Digree-gii koowaad (BS), dhakhatarkii ugu sareeyay jaamacadaasi ee galay kaalinta koowaad waxa weeye sarkaal ka tirsan ciidanka qaranka Somaliland oo magaciisa la yidhaahdo Axmed Shaadi Cabdilaahi, waxaanu qaatay bilad dahab ah waxaana u xidhay biladaasi Raysal wasaaraha dalka Itoobiya.
Waxa kale oo jira 10-ka dhakhtar ee ugu sareeyay waxbarashadaasi 7 ka mid ahi waa reer Somaliland,fagaarahaasi la isku arkay waxay dhakhaatiirtaasi uga soo hooyeen Somaliland magac iyo ammaan balaadhan.
Waxa kale oo jira laba arday oo kale oo dhamaystay kulliyada ciidanka lugta sanadkii 2008/2009 waxaanay qaateen iyaguna bilado dahab ah,haddana waxay ka tirsan yihiin saraakiisha ciidanka qaranka.
Taliyaha Ciidanka qaranku wuxuu u mahad celinayaa dawlada Itoobiya, gaar ahaan Taliyaha ciidanka Fadaraalka Itoobiya Gen. Samooro Yonis, waxa kale oo uu Hambalyo iyo bogaadin u dirayaa saraakiishaasi xilkoodii gutay ee magaca iyo sharafta u soo hooyay dalkooda.”
Waxaanu saacadaha soo socda idin soo gudbin doonaa sawiradii xaflada iyo waraysi aanu la yeelanay Sarkaal Axmed Shaadi Cabdilaahi oo noo suurta gashay in aanu waraysi ka qaadno.
IshaNews Media Group
Adis Ababa Eithopia
MABRUUG SXBKEY DR AHMED SHAADI CABDILAAHI.........
