Cutub Ka Tirsan Ciidanka Qaranka Somaliland Oo Gaadhay Deegaanka Shimbiraalle Ee Gobolka Sanaag + Deegaano Puntland Ah Oo Cabsi Laga Dareemayo Iyo Maamulka Garoowe Oo Walaac Ka Muujiyay.
Shimbiraalle(ishaNews) July. 4, 2011- Wararka ka imanaya deegaanka Shimbiraalle ee Bariga Gobolka Sanaag ayaa sheegaya in ciidamo ka tirsan milatariga Somaliland ay gaadheen maanta deegaankaas, iyaga oo halkaas ku gaadhay si nabad ah.
Ciidamada oo la sheegay in ay si weyn u qalabaysan yihiin ka soo dhaqaaqay fadhiisin ku taala duleedka Bari ee Magaalada Ceerigaabo, waxaana ay la wareegeen inta badan amaanka jidaas, iyada oo aan la sheegin wax iska horimaad ah oo dhacay, waxaana la dhulkaas isaga baxay ciidamo beeleedyo taabacsanaa Puntland oo aan la ogayn halka ay ku dambeeyeen.
Wararku waxa ay sheegin un dadweyanaha ku nool deegaanka Shimbiraale ay si weyn u soo dhaweeyeen ciidanka, iyaga oo ku faraxsan joogitaankooda, maadaama oo amniga uu ahaa mid faraha ka baxay,isla markaana ay dhici jireen dilal caadi noqday oo saameeyay deegaamadaas qaarkood.
Dhanka kale maamul goboleedka Puntland oo ka hadlay galabta arrintan, ayaa walaac xoog leh ka muujiyay qabsashada Shimbiraalle ee ciidanka Somaliland., iyaga oo ku tilmaamay dhul ballaadhsi ay Somaliland ku doonayso in ay kula wareegto deegaano laga taageersan yahay Puntland.
Maxamuud Siciid Dabayl oo ninka Puntland ugu magacaaban guddoomiyaha gobolka Sanaag oo la hadlay qaar ka mida warbaahinta ayaa ugu baaqay dadka reer Shimbiraalle in ay hubka u qaataan sidii ay dhulkooda ugu saari lahayeen ciidamada Somaliland, waxaana uu yidhi” Ciidamada waxa weheliya xoolo dhaqato ka timid Burco,waxaana arintan noolo muuqataa in ay soo socoto mid la mid ah dhibaatada Kalshaale, dadka waxa aanu leenahay dhulkiina ka difaaco kuwa ku soo duulay(Somaliland)”
Mohamed Jamac Hashi
IshaNews Media Group
Hargeisa somaliland