Maxkamadda sare ee dastuuriga ah ee Somaliland ayaa Axadda barri si rasmi ah ugu dhawaaqaysa go’aanka ay ku kala saarayso labada garab ee xisbiga Mucaaradka ah ee UCID oo dacwadooda hore u dhageysatay.
Maxkamadda sare oo dhowrkii maalmood ee u dambeeyay ku hawlanayd sidii ay u kala saari lahayd garabyadda xisbiga Mucaaradka ah ee UCID oo uu ka dhaxeeyo khilaaf xoog badan oo sababey in xukuumadu albaabada u laabto xarunta dhexe ee xisbigaas ayaa la sheegay inay dhamaystirtay hawsheedii ay ku kala saarayso.
Guddoomiyaha maxkamadda sare Md Yuusuf Ismaaciil Cali ayaa la sheegay inuu garyaqaanada labada garab khamiistii soo gaadhsiiyay qoraalka casuumadda ee ay kaga soo qayb-galayaan ku dhawaaqida go’aanka maxkamadda ee ay garabyadda xisbiga UCID mid ka mid ah ugu xukumayso masuuliyadiisa.
Ilaa hadda lama oga go’aanka maxkamadu waxa uu noqonayo, inkasta oo warar aan lagu kalsoonayn sheegayaa in maxkamadu go’aan ku gaadhay in la qabto shirwaynaha xisbiga oo hore labada garab midba wakhti gaar ah u qabtay qabsoomidiisa, iyadda oo la tilmaamay in maxkamadu qoraaladda ay u kala gudbiyeen labada garab kala dhex baxday in wakhtiga hogaamiyayaasha xisbigu dhammaaday sidaa daraadeedna maxkamadu go’aankeedu yahay in shirwayne guud la qabto si hogaan cusub xisbiga loogu doorto.
Dhinaca kale, garabyadda xisbiga UCID iyo taageerayaashooda ayaa u dhag taagaya go’aanka maxkamada sare waxa uu noqonayo, balse waxa la sugaaba waa go’aanka maxkamada oo la filayo inuu dhaco Axadda barri.”
