Muxuu Hogaamiyaha Al Shabaab U Taageeray Kacdoonka Taleex (Dhagayso)
Hogaamiyaha Xarakada Al shabaab ee dhawaan ku biiray ururka Al Qaacida Axmed Cabdi Godane oo loo yaqaano Abuu Zubayr ayaa dhawaan cajalad maqal ah oo uu soo saaray taaso uu ugu talagalay dhiirigalinta taageerayaashiisa kaga hadlay arimo badan oo la xidhiidha dalka Soomaaliya.
Marka laga yimaado hadalada aan ku cusbayn dhagaha Soomaalida ee ka soo baxay Axmed Godane waxaa cajaladan ku cusub soo dahweyn iyo marxabayn uu u jeediyay kacdoonka ka bilawday magaalada Taleex.
Axmed Cabdi Godane waxaa uu soo daliishaday xadiis uu lee yahay 100 sanaba Ilaahay wuxuu umada Islaamka u soo diraa cid diinteeda u cusboonaysiisa.
” Waxaa Ilaahay mahadii ah hal qarni ka dib in jihaadkii daraawiishta in mar labaad gulufkii Islaamku ku soo rogaal celiyo dhulkaas” ayuu yidhi Godane.
Sidoo kale Axmed Cabdi Godane waxaa uu baaq iyo bvoogaadin u diray koox ka dagaalanta buuraha Golis gaar ahaan kooxda Atom isagoo u tilmaamay in ay kulaalayaan oo ay ku dhaw yihiin dhulkii Daraawiishta sida Taleex,Jiidali iyo Jidbaale.
Axmed Cabdi Godane waxaa uu baaq u diray umadda ku nool gobolada Bari,Sool,Sanaag iyo Togdheer isagoo ugu baaqay in ay dib u soo nooleeyaan kaalinkii ay ku lahaayeen Jihaadka.
Hadalka Axmed cabdi Godane waa fariin cad oo uu ku taageerayo kacdoonka Taleex ka bilawday dabayaaqadii sanadkii hore kaaso ugu dambayntyii lagu dhisay maamul.
Maamulka lagu dhisay Taleex ee Khaatumo oo seddex madaxweyne leh ilaa hada wax war ah kama ayasan soo saarin hadalka Godane uu jeediyay isbuucii hore.
Sida laga warqabo maamulka Khaatumo waxaa uu dagaal kala dhexeeyaa maamulka gooni goosad doonka ah ee Hargeysa ka arimiya kaaso xoog ku haysta magaalada Laascaanood sidoo Khaatumo wax xidhiidh ah lama laha maamulka Puntland taa bedelkeedana waxaaba ka dhexeeya loolan siyaasadeed.
Dhinaca kale maamulka Khaatumo dhawaan waxaa ay dawlada Soomaaliya kala noqotay taageero loo fidiyay taaso dhalisay in siyasiyiinta dhisay Khaatumo in ay warbaahinta ka weeraraan masuuliyiinta u saraysa dawlada Soomaaliya iyo xafiiska Qaramada Midoobay u qaabilsan siyaasada Soomaaliya.
Hadalka Godane wuxuu noqon karaa laba mid:
1- In uu taageero iyo beer laxawsi kaga doonayo Khaatumo maadama ay iska soo horjeedaan Somaliland,Puntland iyo xidhiidhka Dawlada Soomaaliya oo aan fiicnayn oo seddexduba dagaal kula jira Al Shabaab markaa in uu Godane is yidhi bal kuwan aayad isku doon saaran tihiin ee taageero ka doono.
2- Axmed Cabdi Godane oo ah nin ka soo jeeda beesha Isaaq in uu hadalkiisa ugu hiilinayo beeshiisa si beesha caalamku ugu aragto dadka dega gobolada Sool,Sanaag iyo Cayn in ay yihiin dad ururkiisa tagaeersan loona tixgaliyo goboladaas dhul argagixiso.
Dadka aad u daraasaya arimaha argagixisada geeska Afrika ayaa su’aalo ka keenay aamuska Khaatumo ka aamusan tahay muddo toddobaad ka dib hadlakaa ka soo yeedhay Axmed Cabdi Godane.
Waxaana ay Khubaradu lee yihiin waxaa loo micnay karaa aamuskaasi in ay taageersan yihiin hadalka taaso ugu dambayn dhalin karta in beesha caalamku il gaar ah ku eegto Khaatumo iyo dadka horkacaya.
Khaatumo waxaa sameeyay siyaasiyiin uu dhawr jeer ku fashilmay siyaasada Soomaaliya hadana rajo ka qaba ka qayb galka tartanka madaxnimada Soomaaliya ee bisha August la qoondeeyay.
halkan ka dhagayso hadalka Axmed Cabdi Godane.
