Gudoomiyaha Golaha Guurtida Oo Muddo Sanad Iyo Dheeraada Arrimo Caafimaad Ugu Maqnaa UK Oo Ku Soo Jeeda Dalka Iyo Qodobada Culus Ee Khilaafka Cakirani Ka Taagan Yahay Ee Lala Sugayo
Hargeysa, May 22, 2012 (Haatuf) - Guddoomiyaha Golaha Guurtida Somaliland Saleebaan Maxamed Aadan oo muddo sanad iyo Bila arrimo Caafimaad ugu maqnaa dalka UK ayaa la sheegay inuu dalka ku soo guryo noqon doono todobaadkan dabayaaqadiisa, waxaanay ilo wareedyadu sheegeen in xaaladiisa Caafimaad ee uu ugu jiray Cusbitaalka uu ka soo baxay.
Guddoomiye Saleebaan Maxamuud Aadan oo safarkaasi Caafimaad u kicitimay horaantii bishii April 2011-kii, xilligaas oo goluhu galay fasaxa kalfadhigii 43aad ee golahaasi, oo dhawrkii bilood ee u dambeeyay si weyn wax layskaga waydiinayay safarka muddada dheer uu gudoomiyuhu dalka kaga maqnaa.
Sida ay Haatuf u xaqiijiyeen ilo wareedyo u dhuun-daloola shirgudoonka golaha guurtida, ayaa noo sheegay in Gudoomiye Saleebaan Maxamuud Aadan dalka ku soo guryo noqon doono dabayaaqada todobaadkan.
Gudoomiyaha ayaa wakhtigan xaadirka ah ku soo beegmaya xilli kalfadhigii 47aad ee golaha guurtidu furmi doono todobaadka soo socda, iyadoo xilligana uu golaha guurtida ka dhex aloosan yahay khilaaf ka dhashay Miisaaniyadii 2011-kii gunnooyin ugu jiray xildhibaanada golaha, oo la sheegay in la musuqmaasuqay, iyadoo sidoo kalena uu khilaaf cakirani ka taagan yahay xoghayaha golahaasi Cabdillaahi Ibraahim Habane (Cabdillaahi dheere), oo isagu gudoomiye ku xigeen ka noqday urur siyaasadeedka Nasiye, taas oo shuruucda dalku ay ka xaaraantimaynayso in shaqaalaha dawladu ay xubno ka noqdaan Axsaabta siyaasada iyagoon iska casilin shaqadii dawlada, arrinkaaasi oo wakhtigan xaadirka ah khilaaf sharci ka dhex aloosay shirgudoonka iyo xildhibaanada golahaasi oo iyagu aqlabaiyadoodu isku raacsan yihiin in shaqada laga saaro Cabdillaahi dheere maadaama uu xil ka qabtay urur siyaasadeed , ayaa waxay ka mid yihiin arrimaha lalasugayo in gudoomiyaha guurtida Saleebaan Maxamuud Aadan uu go’aan ka qaato
Dhinaca kale waxa khilaaf cakirani ka dhex taagan yahay labada gudoomiye ku xigeen ee golaha Sheekh Axmed Sheekh Nuux Furre iyo Siciid Jaamac cali iyo Xoghayaha golaha guurtida oo isku dhinac ah iyo aqlabiyada xildhibaanada golahaasi oo iyagu ka biyo diidan hanaanka maamul iyo shaqo ee shirgudoonku golaha u hogaaminayay muddadii gudoomiye Saleebaan Safarka Caafimaad uu ku maqnaa, kuwaas oo ilaa hada aan xal laga gaadhin furdaamintooda, ayaa ka mid ah xaaladaha murugsan ee Gudoomiye Saleebaan lala sugayo.
